പൂച്ചാക്കല്‍: മാക്കേക്കടവ്  നേരേകടവ് പാലത്തിന്റെ പൈലുകളുടെ നിര്‍മാണം പൂര്‍ത്തിയാകുന്നു.ആകെ 102 പൈലുകള്‍ സ്ഥാപിക്കേണ്ടതില്‍ 63എണ്ണം പൂര്‍ത്തിയായി.
കായലില്‍ ആഴത്തില്‍ സ്ഥാപിക്കുന്ന വലിയ ഇരുമ്പു പൈപ്പിനുള്ളിലൂടെ കമ്പികള്‍ ഇറക്കി കോണ്‍ക്രീറ്റ് ചെയ്യുന്നതാണ് പൈല്‍.ഇതാണ് പാലത്തിന്റെ ഏറ്റവും അടിസ്ഥാനം.പൈലുകള്‍ക്കു മുകളില്‍ പൈല്‍ ക്യാപുകള്‍ സ്ഥാപിക്കും.അതിനുമുകളില്‍ പീയറും(തൂണ്) പീയര്‍ ക്യാപും നിര്‍മിക്കും. പീയര്‍ ക്യാംപുകളെ തമ്മില്‍ ബന്ധിപ്പിച്ചാണ് പ്രധാന ബീമുകള്‍ നിര്‍മിക്കുക.ബീമുകളെ തമ്മില്‍ ബന്ധിപ്പിച്ച് പാലത്തിന്റെ സ്ലാബുകള്‍ നിര്‍മിക്കും.
ായലിലെ ജോലികളാണ് ഇപ്പോള്‍ ചെയ്യുന്നത്.പൈലുകള്‍ സ്ഥാപിക്കല്‍,അവ പൂര്‍ത്തിയായവയില്‍ പൈല്‍ ക്യാപുകള്‍ സ്ഥാപിക്കല്‍, പീയറുകള്‍ സ്ഥാപിക്കല്‍ തുടങ്ങിയവ നടക്കുന്നു. ബീമുകളും പാലത്തിന്റെ ഭാഗങ്ങളും കരയില്‍ നിര്‍മിച്ചശേഷം ജങ്കാറിലൂടെ കായലിലെത്തിച്ച് സ്ഥാപിക്കുന്ന ക്രമീകരണമാണ് തയാറാക്കിയിരിക്കുന്നത്.
കൊച്ചി ആസ്ഥാനമായ ചെറിയാന്‍ വര്‍ക്കി കണ്‍സ്ട്രക്ഷന്‍സാണ് നിര്‍മാണ കരാര്‍ എടുത്തിരിക്കുന്നത്. ഇവര്‍ മാക്കേക്കടവില്‍ സ്ഥലം വാടകയ്‌ക്കെടുത്ത് അവിടെയാണ് നിര്‍മാണ അനുബന്ധ പ്രവര്‍ത്തനങ്ങള്‍ നടത്തുന്നത്. ജങ്കാര്‍,ബോട്ട് തുടങ്ങിയ സൗകര്യങ്ങള്‍ ഉപയോഗിച്ച് നാല്‍പ്പതോളം തൊഴിലാളികള്‍ 24മണിക്കൂറുമാണ് തൊഴില്‍ ചെയ്യുന്നത്.
പൊതുമരാമത്ത് വകുപ്പ്,ഗുണനിലവാര നിയന്ത്രണ ഉദ്യോഗസ്ഥര്‍ തുടങ്ങിയവര്‍ മേല്‍നോട്ടം വഹിക്കുന്നുമുണ്ട്.നിര്‍മാണ പ്രവര്‍ത്തനങ്ങള്‍ തുടങ്ങിയിട്ട് അഞ്ചു മാസത്തോളമായി. രണ്ടു വര്‍ഷത്തിനുള്ളില്‍ പൂര്‍ത്തിയാക്കുകയാണ് ലക്ഷ്യം. തുറവൂര്‍ - പമ്പ സംസ്ഥാനപാതയുടെ രണ്ടാമത് പാലമാണ് മാക്കേക്കടവ് - നേരേകടവ്.
 850 മീറ്റര്‍ നീളത്തിലും ഇരുവശങ്ങളിലും ഒന്നരമീറ്റര്‍ നടപ്പാതയുള്‍പ്പെടെ 11മീറ്റര്‍ വീതിയിലുമാണ് പാലം നിര്‍മിക്കുന്നത്. 100കോടി രൂപയാണ് ചെലവ്.