തുറവൂര്‍: തുറവൂര്‍ ബസ്‌സ്റ്റോപ്പിനു സമീപത്തെ അനധികൃത പാര്‍ക്കിങ് അപകട സാധ്യത വര്‍ധിപ്പിക്കുന്നു.
കവലയ്ക്ക് തെക്ക് ആലപ്പുഴ ഭാഗത്തേയക്കുള്ള സ്റ്റോപ്പിന് സമീപമാണ് ബസുകളും കാറുകളും ഇരുചക്ര വാഹനങ്ങളും തലങ്ങും വിലങ്ങും പാര്‍ക്ക് ചെയുന്നത്. വലിയ വാഹനങ്ങള്‍ ഒന്നിന് പിന്നാലെ ഒന്നായി കൊണ്ടിടുന്നതുമൂലം ദേശീയ പാതയിലൂടെ സര്‍വീസ് നടത്തുന്ന ബസുകള്‍ക്ക് സ്റ്റോപ്പില്‍ നിറുത്തി യാത്രക്കാരെ കയറ്റാനോ ഇറക്കാനോ കഴിയാത്ത സ്ഥിതിയാണ്.
പാര്‍ക്ക് ചെയ്യുന്ന വാഹനങ്ങളുടെ പിന്നിലൂടെ റോഡ് മുറിച്ചു കടക്കുന്ന ആളുകള്‍ അപകടങ്ങളില്‍ പെടുന്നത് നിത്യസംഭവമായിരിക്കുകയാണ്. ഇവിടെ യുടേണ്‍ തിരിയുന്ന വഹനങ്ങള്‍ റോഡരികില്‍ പാര്‍ക്ക്‌ചെയ്യുന്ന വലിയ വാഹനങ്ങള്‍ കാഴ്ച മറക്കുന്നത് മൂലം നിരവധി ഇരുചക്ര വാഹനങ്ങളും മറ്റ് ചെറുവാഹനങ്ങളും കഴിഞ്ഞ ഏതാനും ദിവസങ്ങള്‍ക്കുള്ളില്‍ അപകടത്തില്‍ പെട്ടിരുന്നു.
തൊട്ടടുത്തായി സ്ഥിതിചെയ്യുന്ന വിദേശമദ്യ ചില്ലറ വില്‍പ്പനശാലയില്‍ എത്തുന്നവരുടെ വാഹനങ്ങളും പാതയോരത്തും പാര്‍ക്കു ചെയ്യുന്നതും അപകടങ്ങള്‍ക്ക് കാരണമാവുകയാണ്. നടപ്പാത കൈയേറിയുള്ള വാഹനപാര്‍ക്കിംഗ് സ്‌കൂള്‍ കോളേജ് വിദ്യാര്‍ത്ഥികളും കാല്‍നട യാത്രക്കാരും റോഡില്‍ കയറി സഞ്ചരിക്കേണ്ട സ്ഥിതിയാണ്. ഇതും അപകടങ്ങള്‍ ക്ഷണിച്ചുവരുത്തുകയാണ്. മഹാക്ഷേത്രത്തിലെത്തുന്ന പ്രായമേറിയ ഭക്തജനങ്ങളും ഇതുമൂലം ഏറെ ദുരിതമാണ് അനുഭവിക്കുന്നത്.
അനധികൃത പാര്‍ക്കിങ്മുലം ഇവിടെ നിരവധി പേര്‍ മരിക്കുകയും ഒട്ടേറെപ്പേര്‍ക്ക് പരുക്കേല്‍ക്കുകയും ചെയ്തിട്ടുണ്ടെങ്കിലും ബന്ധപ്പെട്ട അധികാരികള്‍ അനങ്ങാപ്പാറ നയമാണ് സ്വീകരിക്കുന്നതെന്നാണ് നാട്ടുകാരുടെ ആക്ഷേപം.