മലപ്പുറം: എസ്.എസ്.എല്‍.സി പരീക്ഷയും ഹയര്‍ സെക്കന്‍ഡറി പരീക്ഷയും അവസാനിച്ച് കുട്ടികള്‍ വിദ്യാലയങ്ങളില്‍ നിന്ന് വിട പറയുന്ന  സാഹചര്യത്തില്‍ സാധാരണയായി കണ്ടു വരാറുള്ള മോട്ടോര്‍ ബൈക്കിലെ ആണ്‍ കുട്ടികളുടെ അഭ്യാസ പ്രകടനങ്ങള്‍, ആഘോഷ പ്രകടനങ്ങള്‍, കുട്ടികള്‍ തമ്മിലുള്ള അടിപിടി അതിക്രമങ്ങള്‍, സ്‌കൂളിനു നഷ്ടം വരുത്തിവെക്കുന്ന പ്രവര്‍ത്തനങ്ങള്‍ എന്നിവയില്‍ രക്ഷിതാക്കളും സ്‌കൂള്‍ അധികൃതരും ജാഗ്രത പുലര്‍ത്തണമെന്ന് ജില്ലാ ചൈല്‍ഡ് പ്രൊട്ടക്ഷന്‍ യൂനിറ്റ് അറിയിച്ചു.
അവസാന ദിവസം കുട്ടികള്‍ക്ക് പ്രത്യേക സുരക്ഷ ഒരുക്കുന്നതിന്നും അനിഷ്ട സംഭവങ്ങള്‍ ഉണ്ടാകാതെ നോക്കുന്നതിനുമായി സ്‌കൂള്‍ അധികൃതരും രക്ഷിതാക്കളും പ്രത്യേകം ശ്രദ്ധിക്കണം. സ്‌കൂള്‍ അവസാന ദിവസം സ്വന്തം കുട്ടികളെ കൂട്ടുന്നതിനായി രക്ഷിതാക്കള്‍ സ്‌കൂളില്‍ എത്തുന്നത് ഉള്‍പ്പെടെയുള്ള സുരക്ഷാമാര്‍ഗങ്ങള്‍ സ്വീകരിക്കാവുന്നതാണ്.