പൊന്നാനി: കൊവിഡ് 19 വ്യാപകമായതോടെ വിമാന സര്‍വിസുകള്‍ നിര്‍ത്തലാക്കിയതിനു പിറകെ ബുക്കിങ് ചെയ്തവര്‍ക്ക് റീഷെഡ്യൂള്‍ ചെയ്യാനുള്ള അവസരം ഓണ്‍ലൈന്‍ യാത്രാ പോര്‍ട്ടലുകള്‍ നല്‍കി. 

 

റീഷെഡ്യൂളിന് അവസരം നല്‍കാതെ യാത്രക്കാരെ കബളിപ്പിക്കുന്ന ഓണ്‍ലൈന്‍ ട്രാവല്‍ പോര്‍ട്ടലുകള്‍ക്കെതിരേ കഴിഞ്ഞ ദിവസം 'സുപ്രഭാതം' വാര്‍ത്ത നല്‍കിയിരുന്നു. പ്രധാന ഓണ്‍ലൈന്‍ യാത്രാ പോര്‍ട്ടലായ യാത്രാ ഡോട്ട് കോം റീ ഷെഡൂള്‍ അനുവദിക്കുന്നില്ലെന്ന് പരാതി വ്യാപകമായിരുന്നു. ഇതു സംബന്ധിച്ച വാര്‍ത്ത പ്രസിദ്ധീകരിച്ചതിന് പിന്നാലെ ഇവര്‍ നിലപാട് മാറ്റുകയും യാത്രക്കാര്‍ക്ക് റീഷെഡ്യൂള്‍ ചെയ്യാനുള്ള അവസരം നല്‍കുകയും ചെയ്തതായി പരാതിക്കാര്‍ തന്നെ വ്യക്തമാക്കി. 

 

ഏപ്രില്‍ ഒന്നിനും 15 നുമായി ജര്‍മ്മനിയിലേക്ക് കുടുംബസമേതം യാത്ര പോകാന്‍ വിമാന ടിക്കറ്റ് എടുത്ത ജെബിന്‍ എസ് കൊട്ടാരം, സെബിന്‍ എസ് കൊട്ടാരം എന്നിവരാണ് പരാതി നല്‍കിയിരുന്നത്. ടിക്കറ്റ് റീഷെഡ്യൂള്‍ ചെയ്യാന്‍ ശ്രമിക്കുമ്പോള്‍ ഇത്തരം പോര്‍ട്ടലുകള്‍ അനുവദിക്കുന്നില്ലെന്നായിരുന്നു ഇവരുടെ പരാതി. രണ്ടുലക്ഷം രൂപയായിരുന്നു ഇവരുടെ ടിക്കറ്റ് ചാര്‍ജ്. ഓണ്‍ലൈന്‍ പോര്‍ട്ടലുകളുടെ ഇത്തരം നിലപാട് വാര്‍ത്തയായതോടെ വന്‍ പ്രതിഷേധത്തിന് ഇടയായി. ഒപ്പം അധികൃതരുടെ ശ്രദ്ധയിലുംപെട്ടു. ഇതിനു പിന്നാലെയാണ്  

ഓണ്‍ലൈന്‍ പോര്‍ട്ടലുകള്‍ നിലപാടുകള്‍ മാറ്റി യാത്രക്കാര്‍ക്ക് അനുകൂല നടപടിയുമായി വന്നത്. ആയിരക്കണക്കിന് യാത്രക്കാര്‍ക്കാണ് ഈ തീരുമാനം ഗുണമരമാവുക.