നെടുമങ്ങാട്: ലോക്ക് ഡൗണില്‍ പൂര്‍ണമായും ഒറ്റപ്പെട്ട് ഭക്ഷണമില്ലാതെ കാട്ടുപേരക്കയും കഴിച്ചു വന മധ്യത്തില്‍ അതിജീവനത്തിന് ശ്രമിച്ച  തൊഴിലാളി കുടുംബങ്ങള്‍ക്ക് ഭക്ഷ്യധാന്യങ്ങളെത്തി. 

തിരുവനന്തപുരം ജില്ലയിലെ വിതുര ഗ്രാമ പഞ്ചായത്തില്‍ ഉള്‍പ്പെടുന്നതും വനത്തിലൂടെ 15 കിലോമീറ്ററോളം താണ്ടി എത്തേണ്ടതുമായ ബോണക്കാട് എസ്റ്റേറ്റിലെ നൂറ്റമ്പതോളം തൊഴിലാളി കുടുംബങ്ങളായിരുന്നു ലോക്ക് ഡൗണ്‍ നിലവില്‍ വന്നതോടെ ഒറ്റപ്പെട്ടത്. ആകെയുള്ള കെ.എസ്.ആര്‍.ടി.സി ബസ് യാത്ര അവസാനിപ്പിച്ചതോടെ ഇവര്‍ ബാഹ്യലോകത്തുനിന്നു പൂര്‍ണമായും ഒറ്റപ്പെടുകയായിരുന്നു. തൊഴിലാളി കുടുംബങ്ങളുടെ ദുരവസ്ഥ കഴിഞ്ഞ ദിവസം സുപ്രഭാതം പുറത്തുകൊണ്ടുവന്നിരുന്നു. ഈ  സാഹചര്യത്തിലാണ് യുവ ഭാരത് മിഷന്‍ എന്ന ഓണ്‍ലൈന്‍ കൂട്ടായ്മയുടെ അംഗങ്ങള്‍ ഭക്ഷ്യധാന്യങ്ങളും ആവശ്യവസ്തുക്കളും മാസ്‌ക്കുകളുമൊക്കെയായി ബോണക്കാട് ചുരം കയറി ഇവര്‍ക്കരുകിലേക്ക് എത്തിയത്. 

യൂത്ത് കോണ്‍ഗ്രസ് മുന്‍ സംസ്ഥാന വൈസ് പ്രസിഡന്റ് ആറ്റിങ്ങല്‍ സ്വദേശി നിയാസ് ഭാരതിയുടെ നേതൃത്വത്തിലാണ് കഴിഞ്ഞ ദിവസം തൊഴിലാളി ലയങ്ങളില്‍ സാധനങ്ങള്‍ വിതരണം ചെയ്തത്. രണ്ടാഴ്ചത്തേക്കുള്ള അരി, പലവ്യഞ്ജനങ്ങള്‍, പച്ചക്കറി, മാസ്‌ക് തുടങ്ങിയവയാണ് എത്തിച്ചത്. ലോക്ക് ഡൗണ്‍ നിലവില്‍ വന്ന ശേഷം അധികൃതര്‍ ഉള്‍പ്പെടെ ആരും തങ്ങളെ തിരിഞ്ഞുനോക്കിയിട്ടില്ലെന്നു തൊഴിലാളി കുടുംബങ്ങള്‍ കുറ്റപ്പെടുത്തി.