മാഹി: സുപ്രിം കോടതി വിധിയുടെ പശ്ചാത്തലത്തില്‍ നിലവിലുണ്ടായിരുന്ന മദ്യഷാപ്പുകള്‍ക്ക് ഇന്നലെ താഴുവീണു. മാഹിയില്‍ നിറഞ്ഞുനിന്ന മദ്യഷാപ്പുകള്‍ പൂട്ടിയതോടെ നഗരം വിജനമായി. പൂഴിത്തല മുതല്‍ മാഹി പാലം വരെയുള്ള 22 മദ്യഷാപ്പുകളാണ് കോടതി വിധിയോടെ അടച്ചത്. പള്ളൂര്‍, പന്തക്കല്‍ ഭാഗങ്ങളിലുള്ള ബാറുകളില്‍ ഇന്നലെ നല്ല തിരക്ക് അനുഭവപ്പെട്ടു. മാഹിയില്‍ നിന്നു പള്ളൂരിലേക്ക് പോകുന്ന ബസിലും നല്ല തിരക്കായിരുന്നു. മാഹി റെയില്‍വേ സ്റ്റേഷന്‍ റോഡിലെ ബാറില്‍ ക്യൂ നിന്നായിരുന്നു ജനങ്ങള്‍ മദ്യം വാങ്ങിച്ചത്. പല ബാറുകള്‍ക്കും ഇതേ വരെ പകരം സംവിധാനമായിട്ടില്ല. പിന്നെ ചിലര്‍ പണി തുടങ്ങി ജനങ്ങളുടെ പ്രതിഷേധത്തെ തുടന്ന് പാതി വഴിയില്‍ നിര്‍ത്തുകയായിരുന്നു.