മട്ടാഞ്ചേരി:കടുത്ത വേനല്‍ ചൂടില്‍ നിന്ന് രക്ഷ നേടുന്നതിനായി ഫോര്‍ട്ട്‌കൊച്ചി കടപ്പുറത്തും കുട്ടികളുടെ പാര്‍ക്കിലും എത്തുന്നവരുടെ എണ്ണം വര്‍ധിക്കുന്നു.പകലും രാത്രിയിലുമെല്ലാം ഒരു പോലെയാണ് ചൂട്.രാത്രിയില്‍ ഇടക്കിടെ വൈദ്യുതി വിതരണം തടസ്സപ്പെടുന്നത് നാട്ടുകാരെ വലിയ ബുദ്ധിമുട്ടിലാക്കിയിട്ടുണ്ട്.കടപ്പുറത്തും പാര്‍ക്കിലുമെല്ലാം നല്ല കാറ്റ് ലഭിക്കുമെന്നതാണ് ആളുകളെ ഇങ്ങോട്ട് ആകര്‍ഷിക്കുന്നത്.
കുട്ടികള്‍ക്ക് അവധിക്കാലമായതിനാല്‍ ഇവരും ചൂടില്‍ നിന്ന് ആശ്വാസം ലഭിക്കാന്‍ എത്തുന്നത് ഇവിടേക്കാണ്.ചൂടിനെ തുടര്‍ന്ന് നിര്‍മ്മാണ തൊഴിലാളികളുടേയും മറ്റ് പുറം തൊഴിലെടുക്കുന്നവരുടേയും ജോലി സമയം ക്രമീകരിച്ചിട്ടുണ്ടെങ്കിലും ഇത് രാത്രിയില്‍ ഇവര്‍ക്ക് ബുദ്ധിമുട്ട് സൃഷ്ടിക്കുന്നുണ്ട്.ഡ്രൈവിങ് ടെസ്റ്റും വാഹന പരിശോധനയുടെയുമെല്ലാം സമയം മോട്ടോര്‍ വാഹന വകുപ്പ് ക്രമീകരിച്ചിട്ടുണ്ട്.വീടുകളില്‍ ഇരിക്കാന്‍ പോലും കഴിയാത്ത സാഹചര്യമാണ്.കോണ്‍ക്രീറ്റ് കെട്ടിടങ്ങളില്‍ കഴിയുന്നവര്‍ക്ക് പൊള്ളുന്ന ചൂടാണ് അനുഭവപ്പെടുന്നത്.ഇളനീരിനും ജ്യൂസുകള്‍ക്കുമെല്ലാം വലിയ കച്ചവടമാണിപ്പോള്‍.കുപ്പിവെള്ള കച്ചവടവും പൊടിപൊടിക്കുകയാണ്.