മാനന്തവാടി: പൊലിസ് ഉദ്യോഗസ്ഥന്‍ ചമഞ്ഞ് ആള്‍മാറാട്ടം നടത്തിയ സംഭവത്തില്‍ ഒരാള്‍ അറസ്റ്റില്‍.
കൊല്ലം കുണ്ടുമണ്‍ രജനി നിവാസ് പി.എം രാജീവ് (43)നെയാണ് വെള്ളമുണ്ട പൊലിസ് അറസ്റ്റ് ചെയ്തത്. വെള്ളമുണ്ട പൊലിസ് സ്‌റ്റേഷനിലെ എ.എസ്.ഐ ആയിരുന്ന രാജന്റെ പേരാണ് ഇയാള്‍ ദുരുപയോഗം ചെയ്തത്. പത്ത് ദിവസം മുമ്പ് മദ്യലഹരിയില്‍ അസമയത്ത് തരുവണയിലെ ഒരു സ്ത്രീയുടെ വീട്ടിലെത്തി ബഹളമുണ്ടാക്കിയതിനെ തുടര്‍ന്ന് നാട്ടുകാര്‍ രാജീവിനെ പിടികൂടി ചോദ്യം ചെയ്തിരുന്നു.അന്ന് താന്‍ എ.എസ്.ഐ രാജനാണെന്നും കേസ് അന്വേഷണത്തിന്റെ ഭാഗമായി വന്നതാണെന്നും പറഞ്ഞ് രാജീവ് നാട്ടുകാരെ അസഭ്യം പറയുകയും തുടര്‍ന്ന് കബളിപ്പിച്ച് മുങ്ങുകയും ചെയ്തിരുന്നു. ഈ സംഭവം സോഷ്യല്‍ മീഡിയവഴി പ്രചരിച്ചതോടെ ശ്രദ്ധയില്‍പെട്ട എ.എസ്.ഐ രാജന്‍ പൊലിസില്‍ പരാതി നല്‍കിയിരുന്നു. ഇതിന്റെ അടിസ്ഥാനത്തിലാണ് പൊലിസ് രാജീവനെ അറസ്റ്റ് ചെയ്തത്. ഐ.പി.സി 419 വകുപ്പ് പ്രകാരം ആള്‍മാറാട്ടത്തിന് കേസ് രജിസ്റ്റര്‍ ചെയ്തിട്ടുണ്ട്. തിരുവനന്തപുരം സ്വദേശിയായ രാജീവ് കൊല്ലത്ത് ഭാര്യാ ഗൃഹത്തിലാണ് താമസിക്കുന്നത്. നിര്‍മാണതൊഴിലാളിയായ ഇയാള്‍ നിലവില്‍ നിരവില്‍പ്പുഴയില്‍ വാടകയ്ക്ക് താമസിച്ചുകരികയാണ്.