ജനീവ: കൊവിഡ് ബാധിച്ച് ഭേദമായവര്‍ക്ക് അത് വീണ്ടും ഉണ്ടാവില്ലെന്ന് ഉറപ്പിക്കാനാവില്ലെന്ന് ലോകാരോഗ്യ സംഘടന. ശരീരം കൊവിഡിനെതിരേ പൂര്‍ണ പ്രതിരോധം നേടിയെന്നതിന് വ്യക്തമായ തെളിവുകള്‍ ഇല്ല. നിരവധി രാജ്യങ്ങള്‍ രോഗം ഭേദമായവരില്‍ നിന്നുള്ള ആന്റിബോഡി വേര്‍തിരിച്ച് ചികിത്സക്കായി ഉപയോഗിക്കുന്നതിനുള്ള ശ്രമങ്ങള്‍ ആരംഭിച്ചതിനിടെയാണ് ഡബ്ല്യു. എച്ച്. ഒ യുടെ മുന്നറിയിപ്പ്. കേരളത്തിലും ഇത്തരം ചികിത്സയ്ക്കു ശ്രമം നടത്തുന്നുണ്ട്.
ലോകാരോഗ്യ സംഘടനയുടെ സീനിയര്‍ എപ്പിഡെമോളജിസ്റ്റുകളാണ് ഇക്കാര്യം വ്യക്തമാക്കിയത്. രോഗത്തിനെതിരേ ശരീരം സ്വാഭാവിക പ്രതിരോധം ആര്‍ജിക്കുന്നുണ്ടോയെന്നറിയാനായി സെറോളജി പരിശോധനകള്‍ നടത്താനാണ് വിവിധ രാജ്യങ്ങള്‍ ശ്രമിക്കുന്നത്. എന്നാല്‍ ഈ പരിശോധനകളില്‍ കൂടി വ്യക്തികള്‍ രോഗത്തിനെതിരേ പ്രതിരോധം നേടിയെന്നോ രോഗം അവരില്‍ വീണ്ടും ബാധിക്കാതിരിക്കുമോയെന്നും കണ്ടെത്താനാകില്ലെന്ന് ഡബ്ല്യു. എച്ച്. ഒ എമര്‍ജിങ് ഡിസീസ് യൂനിറ്റ്തല മേധാവി ഡോ.മരിയ വാന്‍ കെര്‍ക്കോവ് പറഞ്ഞു. ലോകത്ത് 2.1 ദശലക്ഷം കൊവിഡ് ബാധിതരില്‍ 5.6 ലക്ഷം പേര്‍ രോഗമുക്തരായിട്ടുണ്ട്. ജോണ്‍ഹോപ്കിന്‍സ് സര്‍വകലാശാലയുടെ കണക്കുകള്‍ പ്രകാരമാണിത്. അതുപോലെ കറന്‍സി നോട്ടുകളിലൂടെയും നാണയങ്ങളിലൂടെയും കൊവിഡ് വൈറസ് പകരുമെന്നതിന് തെളിവുകള്‍ ഇല്ലെന്നും ഡബ്ല്യു.എച്ച്.ഒ വ്യക്തമാക്കി. എന്നാല്‍ കൊവിഡ് ബാധിച്ച ഒരു വ്യക്തി ചുമയ്ക്കുന്നതിലൂടെയോ തുമ്മുന്നതിലൂടെയോ മറ്റോ അടുത്തുള്ള വസ്തുക്കളില്‍ വൈറസ് പരക്കാന്‍ സാധ്യതയുണ്ട്. അത്തരത്തില്‍ കറന്‍സികളും കോയിനുകളും ഉള്‍പ്പെടെ രോഗവാഹകമാകാമെന്നതിനാല്‍ അവ സ്പര്‍ശിച്ചാലും കൈകള്‍ അണുവിമുക്തമാക്കുന്നതാണ് സുരക്ഷിതമെന്ന് ലോകാരോഗ്യസംഘടന അറിയിച്ചിട്ടുണ്ട്.