കോഴിക്കോട്:കൊവിഡ്-19, ലോക്ക് ഡൗണ്‍ തുടങ്ങിയ ദിവസം മുതല്‍ പൊലീസിന് ആവശ്യാനുസരണം ഭക്ഷണവും, പാനീയങ്ങളും തയ്യാറാക്കി പിക്കറ്റ് പോസ്റ്റുകളില്‍ സ്ഥിരമായി എത്തിച്ചുകൊണ്ടിരുന്ന ആളെ മാറാട് പൊലീസ് സ്റ്റേഷനിലെ സേനാംഗങ്ങള്‍ മൊമെന്റ്റോയും, പൊന്നാടയും നല്‍കി ആദരിച്ചു.

മാത്തോട്ടത്ത് പച്ചക്കറി കച്ചവടം ചെയ്യുന്ന മുരിങ്ങാക്കണ്ടിപറമ്പില്‍ മുഹമ്മദ് റാഫിയാണ് പൊലീസിന്റെ ആദരം നേടിയത്. വലിയ ജനസാന്ദ്രത ഉള്ള മാത്തോട്ടം, മാറാട് പ്രദേശങ്ങളില്‍ പൊലീസിന് ഭാരിച്ച ജോലിയാണ് ഉണ്ടായിരുന്നത്. ഇന്‍സ്‌പെക്ടര്‍ കെ. വിനോദന്‍ റാഫിയ്ക്ക് മൊമെന്റ്റോ നല്‍കി ആദരിച്ചു. എസ്.ഐ ഹരീഷ്, ജനമൈത്രി ബീറ്റ് ഓഫീസര്‍മാരായ കെ.ധനേഷ്,സി. സുജാത, പി സരീഷ്, കെ.ഷിനോജ് എന്നിവര്‍ പങ്കെടുത്തു.