ചങ്ങരംകുളം: സഹജീവികളെ സഹായിക്കാനുള്ള മനസുമായി മാതൃകയാവുകയാണ് നിഥില്‍ എന്ന ഒമ്പത് വയസ്സുകാരന്‍.
മിഠായി വാങ്ങാനും മറ്റുമായി കിട്ടുന്ന നാണയത്തുട്ടുകള്‍ ശേഖരിച്ച് രോഗികളെ പരിചരിക്കുന്ന കാരുണ്യം പാലീയേറ്റീവ് കെയറിന്റെ വളണ്ടിയര്‍മാര്‍ക്ക് സംഭാവന കൈമാറിയാണ് ചെറുപ്രായത്തില്‍ തന്നെ കാരുണ്യപ്രവര്‍ത്തനങ്ങള്‍ക്ക് മാതൃക കാണിച്ചത്.
അപ്പങ്ങള്‍ ഉണ്ടാക്കി കടയില്‍ വില്‍പന നടത്തുന്ന ജോലിയാണ് പിതാവിന്. കാലത്ത് മദ്‌റസയില്‍ പോകുമ്പോള്‍ കടകളില്‍ നല്‍കാന്‍ വേണ്ടി പിതാവ് നിഥിലിന്റെ പക്കല്‍ അപ്പം നല്‍കും. മദ്‌റസ വിട്ട് വീട്ടിലെത്തിയാല്‍ പോക്കറ്റ് മണിയായി അഞ്ച് രൂപ ദിവസവും നല്‍കും.
കൂടാതെ മദ്‌റസ അധ്യാപകരുടെ സഹായഹസ്തങ്ങളും നിഥിലിനുണ്ട്. നല്‍കുന്ന പണം സ്വരൂപിച്ച് ഈ അധ്യയന വര്‍ഷം അവസാനിച്ചപ്പോള്‍ ചങ്ങരംകുളം കാരുണ്യം പാലിയേറ്റീവ് കെയര്‍ ക്ലിനിക്കില്‍ എത്തി സംഭാവനയായി നല്‍കുകയായിരുന്നു. നന്നമുക്ക് സൗത്ത് എ.എം.എല്‍.പി സ്‌കൂള്‍ നാലാം തരം വിദ്യാര്‍ഥിയാണ് നിഥിന്‍. ആയിനിച്ചോട് പാറക്കല്‍ ശരീഫിന്റെയും സഹ്‌റാബാനുവിന്റെ യും രണ്ടാമത്തെ മകനാണ് നിഥില്‍.