മട്ടാഞ്ചേരി: കൊച്ചിയിലെത്തിയ വിദേശവനിതയ്ക്ക് ഹോംസ്റ്റേയില്‍ സുഖപ്രസവം.
അമേരിക്കക്കാരിയായ ബ്രിട്ടണിയാണ് കൊച്ചി കൂവപ്പാടത്തെ ആദംസ് ഹോംസ്റ്റേയില്‍ പെണ്‍കുഞ്ഞിനു ജന്മംനല്‍കിയത്. ഞായറാഴ്ച വൈകിട്ട് 3.55നായിരുന്നു പ്രസവം.
ആശുപത്രിയില്‍ പോകാമെന്ന് ഹോംസ്റ്റേ ഉടമ ഫിറോസ് പറഞ്ഞെങ്കിലും പഴയ കേരളീയ രീതിയില്‍ പ്രസവം മതിയെന്ന വാശിയിലായിരുന്നു ബ്രിട്ടണിയും ഭര്‍ത്താവ് മിച്ചലും. കുഞ്ഞിന് പേസ് എന്നാണു പേരിട്ടിരിക്കുന്നത്.
പ്രസവത്തിനുശേഷം മാതാവിനേയും കുഞ്ഞിനേയും പ്രാഥമിക ശുശ്രൂഷയ്ക്കായി സമീപത്തെ സ്വകാര്യ ആശുപത്രിയിലേക്കു മാറ്റി. മാതാവും കുഞ്ഞും സുഖംപ്രാപിച്ചുവരുന്നതായി ആശുപത്രിവൃത്തങ്ങള്‍ പറഞ്ഞു.