പരപ്പനങ്ങാടി: കഞ്ചാവ് ചെടി കണ്ട് നാട്ടുകാര്‍ വിവരമറിയിച്ചതിനെ തുടര്‍ന്ന് കുതിച്ചെത്തിയ എക്‌സൈസ് സംഘത്തിന് നിരാശരായി മടങ്ങേണ്ടി വന്നു. പരപ്പനങ്ങാടി ബീച്ച് റോഡരികില്‍ രഹസ്യമായി കഞ്ചാവ് വില്‍പന നടത്തുന്നതായി സംശയിക്കുന്ന പറമ്പിലാണ് കഞ്ചാവ് ചെടികള്‍ കണ്ടെത്തിയത്. തുടര്‍ന്ന് കഞ്ചാവെന്ന് സംശയിക്കുന്ന കുറ്റിക്കാടുകള്‍ മൊബൈലില്‍ പകര്‍ത്തിയ പൊതുപ്രവര്‍ത്തകര്‍ വാട്ട്‌സ്ആപ്പിലൂടെ എക്‌സൈസ് അധികൃതര്‍ക്ക് വിവരങ്ങളടക്കം കൈമാറുകയായിരുന്നു. ഉടന്‍ പരപ്പനങ്ങാടി റെയ്ഞ്ച് എക്‌സൈസ് അധികൃതര്‍ സ്ഥലത്തെത്തിയെങ്കിലും അതിന് മുന്‍പെകഞ്ചാവ് ചെടികളുടെ അടിവേരുകളടക്കം മാന്തിയെറിഞ്ഞ നിലയിലാണ് കണ്ടെത്തിയത്. എക്‌സൈസ് സംഘത്തേക്കാള്‍ ജാഗ്രതയില്‍ കഞ്ചാവ് ലോബി പ്രദേശത്ത് ഇടപെട്ടത് എക്‌സൈസ് സംഘത്തെ അത്ഭുതപ്പെടുത്തി.