തിരുവനന്തപുരം: ഡ്രൈവര്‍മാരുടെ അശ്രദ്ധക്കും ക്രൂരതക്കുമെതിരേ സ്വീകരിക്കാന്‍ ഉദ്ദേശിക്കുന്ന നടപടികളെക്കുറിച്ചറിയിക്കണമെന്ന് സംസ്ഥാന മനുഷ്യാവകാശ കമ്മിഷന്‍ ഡി.ജി.പിയോടും ഗതാഗത കമ്മിഷണറോടും ആവശ്യപ്പെട്ടു. കൊച്ചി മരടിലെ സ്‌കൂള്‍ വാന്‍ അപകടത്തിന്റെയും തിരുവനന്തപുരം തോന്നയ്ക്കലില്‍ ഓട്ടോറിക്ഷ ഡ്രൈവര്‍ യുവതിയെ പീഡിപ്പിക്കാന്‍ നടത്തിയ ശ്രമത്തിന്റെയും പശ്ചാത്തലത്തിലാണ് നടപടി. ജൂലൈ നാലിനകം റിപ്പോര്‍ട്ട് നല്‍കണമെന്നാണ് കമ്മിഷന്‍ ആക്റ്റിങ് അധ്യക്ഷന്‍ പി. മോഹനദാസ് ഉത്തരവിട്ടിരിക്കുന്നത്. മനുഷ്യാവകാശ പ്രവര്‍ത്തകനായ പി. കെ രാജുവാണ് പരാതി നല്‍കിയത്.
ഡ്രൈവര്‍മാരുടെ അനാസ്ഥകാരണം അപകടങ്ങള്‍ പതിവാണെന്ന് പരാതിയില്‍ പറയുന്നു. അശ്രദ്ധയും ക്രൂരതയും കാണിക്കുന്ന ഡ്രൈവര്‍മാരുടെ ലൈസന്‍സ് എന്നെന്നേയ്ക്കുമായി റദ്ദാക്കണമെന്നും പരാതിക്കാരന്‍ ആവശ്യപ്പെട്ടു.