സ്വകാര്യ ടെലികോം കമ്പനിയുടെ സേവനത്തിലെ പാളിച്ചകൾക്കെതിരെ ഒരു വർഷത്തെ നിയമപോരാട്ടത്തിനൊടുവിൽ വിജയം കണ്ടെത്തിയിരിക്കുകയാണ് മലപ്പുറം കോടൂർ സ്വദേശി എം.ടി. മുർഷിദ്. മൊബൈലിൽ റേഞ്ച് ലഭിക്കാത്തതും ഇന്റർനെറ്റ് വേഗത കുറവായതും സംബന്ധിച്ച് നിരന്തരം പരാതി നൽകിയിട്ടും നടപടിയെടുക്കാത്തതിനെ തുടർന്ന് മുർഷിദ് മലപ്പുറം ജില്ലാ ഉപഭോക്തൃ കോടതിയെ സമീപിച്ചിരുന്നു. കോടതി, ടെലികോം കമ്പനിയോട് 15,000 രൂപ നഷ്ടപരിഹാരവും 5,000 രൂപ കോടതി ചെലവിനുമായി നൽകാൻ ഉത്തരവിട്ടു. കൂടാതെ, റീചാർജ് ചെയ്ത തുകയും തിരികെ നൽകണമെന്ന് വിധിക്കുകയായിരുന്നു.

നിയമസഹായമില്ലാതെ സ്വന്തമായി കോടതിയിൽ ഹാജരായി വാദിച്ചാണ് യൂട്യൂബറായ എം.ടി. മുർഷിദ് ഈ നേട്ടം കൈവരിച്ചത്. ഇന്റർനെറ്റ് വേഗത കുറവായതിനാൽ യൂട്യൂബിലും സോഷ്യൽ മീഡിയയിലും വീഡിയോകൾ അപ്‌ലോഡ് ചെയ്യാൻ ഏറെ ബുദ്ധിമുട്ടിയിരുന്നെന്ന് മുർഷിദ് പറഞ്ഞു. കമ്പനിക്ക് ഫോൺ വഴിയും രേഖാമൂലവും നിരവധി തവണ പരാതി നൽകിയെങ്കിലും പ്രതികരണം ലഭിച്ചില്ല. തുടർന്നാണ് മുർഷിദ് കോടതിയെ സമീപിക്കാൻ തീരുമാനിച്ചത്.

"ഞാൻ ആദ്യം 249-299 രൂപയുടെ റീചാർജ് ചെയ്തിരുന്നു. പിന്നീട് കമ്പനി തുക 349 രൂപയാക്കി ഉയർത്തി. പണം നൽകുന്നുണ്ടെങ്കിലും സേവനം ലഭിക്കാത്തത് വലിയ പ്രയാസമായി," മുർഷിദ് വ്യക്തമാക്കി. കമ്പനി പ്രതിനിധികളുമായുള്ള സംഭാഷണങ്ങൾ രേഖപ്പെടുത്തി സൂക്ഷിച്ചിരുന്നത് കോടതിയിൽ നിർണായക തെളിവായി. "കോടതിയിൽ കമ്പനി പ്രശ്നമില്ലെന്ന് വാദിച്ചെങ്കിലും, ഞാൻ നൽകിയ ഫോൺ സംഭാഷണ രേഖകൾ സത്യസന്ധത തെളിയിച്ചു," മുർഷിദ് കൂട്ടിച്ചേർത്തു.

കാടും കുന്നും അതിജീവിച്ചു ഇന്റർനെറ്റ് എത്തുമ്പോൾ; എന്താണ് മസ്കിന്റെ സ്റ്റാർലിങ്ക് readmore..

ആദ്യമായാണ് താൻ കോടതിയെ സമീപിക്കുന്നതെന്ന് മുർഷിദ് പറഞ്ഞു. "കൺസ്യൂമർ കോടതിയിൽ എങ്ങനെ പരാതി നൽകണമെന്ന് പഠിച്ച്, സ്വന്തമായി രേഖകൾ തയ്യാറാക്കി. സുഹൃത്തുക്കളിൽ നിന്നുള്ള സഹായങ്ങളിലൂടെയുമാണ് കോടതിയോയെ സമീപിച്ചതെന്നും മുർഷിദ് വ്യക്തമാക്കി. കമ്പനി 5G സേവനം വാഗ്ദാനം ചെയ്തിട്ടും ലഭിക്കാത്തതാണ് പരാതിക്ക് കാരണമായത്.