തൃശൂര്‍: ഇന്‍ഷുറന്‍സ് പ്രീമിയം വന്‍തോതില്‍ വര്‍ദ്ധിപ്പിച്ചതടക്കമുള്ള കേന്ദ്രസര്‍ക്കാര്‍ നടപടിയില്‍ പ്രതിഷേധിച്ച് ലോറി ഉടമകള്‍ ഏഴു ദിവസമായി അഖിലേന്ത്യതലത്തില്‍ നടത്തുന്ന സമരം അവസാനിപ്പിക്കാന്‍ തമിഴ്‌നാട്ടിലെ ലോറിസമരം ചര്‍ച്ചയിലൂടെ തമിഴ്‌നാട് സര്‍ക്കാര്‍ പരിഹരിച്ചതുപോലെ കേരള ഗതാഗതവകുപ്പ് മന്ത്രി തോമാസ്ചാണ്ടി ചര്‍ച്ചയിലുടെ സമരം അവസാനിപ്പിക്കാന്‍ നടപടിയെടുക്കണമെന്ന് കേരള വ്യാപാരി വ്യവസായി കോണ്‍ഫെഡറേഷന്‍ സംസ്ഥാന ചെയര്‍മാന്‍ കെ.എന്‍ മര്‍സൂക്ക് സംസ്ഥാന കണ്‍വീനര്‍ ബിന്നി ഇമ്മട്ടി എന്നിവര്‍ ആവശ്യപ്പെട്ടു.
ചരക്ക് ലോറി സമരം കേരളത്തിലെ വ്യാപാര വ്യവസായ കാര്‍ഷിക മേഖലക്ക് വലിയ പ്രതിസന്ധി സൃഷ്ടിച്ചിരിക്കുകയാണ്. ലോറി സമര ഫലമായി കേരളത്തിലേക്കുള്ള ചരക്ക് ലോറികളുടെ വരവ് ഏതാണ്ട് നിലച്ചിരിക്കുകയാണ്.
അരി, പച്ചക്കറി തുടങ്ങിയ ഉത്പന്നങ്ങള്‍ അന്യസംസ്ഥാനങ്ങളെയാണ് കേരളം ആശ്രയിക്കുന്നത്. അതോടൊപ്പം കോടിക്കണക്കിന് രൂപയുടെ വരുമാനമാണ് കേന്ദ്ര - സംസ്ഥാന ഗവണ്‍മെന്റുകള്‍ക്ക് നഷ്ടപ്പെടുന്നത്.
നിത്യോപയോഗസാധനങ്ങളുടെയും എല്ലാ അവിശ്യവസ്തുക്കളുടെയും വിലവര്‍ദ്ധനവിന് ഈ സമരം കാരണമാകും. അനിശ്ചിതമായി നീളുന്ന ലോറി സമരം ജനങ്ങളുടെ ജീവിതം നരകതുല്യമാക്കാന്‍ ഇടയാക്കുമെന്ന് കെ.എന്‍ മര്‍സൂക്കും ബിന്നി ഇമ്മട്ടിയും പ്രസ്താവനയില്‍ പറഞ്ഞു.