ലഖ്‌നൗ: ഉത്തര്‍പ്രദേശില്‍ ഇന്നലെയുണ്ടായ ശക്തമായ പൊടിക്കാറ്റിലും കൊടുങ്കാറ്റിലും 13 പേര്‍ കൊല്ലപ്പെട്ടു. 28 പേര്‍ക്ക് പരുക്കേറ്റു. സീതാപൂര്‍, ഗോണ്ട, ശ്രാവസ്തി, ഫൈസാബാദ്, ബാസ്തി ജില്ലകളിലും അതിര്‍ത്തിപ്രദേശങ്ങളിലുമാണ് അപകടം. സീതാപൂരില്‍ ആറുപേരും ഗോണ്ടയില്‍ മൂന്നുപേരും കൗസാമ്പിയില്‍ രണ്ടുപേരും ഫൈസാബാദിലും ഹര്‍ദോയിയിലും ഒരാള്‍ വീതവുമാണ് കൊല്ലപ്പെട്ടത്. മണിക്കൂറില്‍ 75 കിലോമീറ്റര്‍ വേഗതയിലാണ് ഉത്തര്‍പ്രദേശില്‍ കാറ്റ് വീശിയത്. രണ്ടു മണിക്കൂറോളം കാറ്റ് വീശി. കനത്ത മഴയെയും ശക്തമായ കാറ്റിനെയും തുടര്‍ന്ന് അലഹബാദ്, മിര്‍സാപൂര്‍, സാന്റ് റാവിദാസ് നഗര്‍ ജില്ലകളില്‍ മുന്നറിയിപ്പ് നല്‍കിയിട്ടുണ്ട്. ജില്ലാ ജഡ്ജിമാരോട് അടിയന്തര രക്ഷാപ്രവര്‍ത്തനത്തിന് നേതൃത്വം നല്‍കാന്‍ മുഖ്യമന്ത്രി യോഗി ആദിത്യനാഥ് ഉത്തരവിട്ടു.