കാഞ്ഞങ്ങാട് : ടി.എന്‍.ടി ചിട്ടി കമ്പനി ഏജന്റുമാര്‍ക്ക് പണമടച്ച ചിറ്റാളന്മാരുടെ ഭീഷണി. വീടു കയറിയുള്ള ഭീഷണിയെ തുടര്‍ന്ന് 45 ഓളം സ്ത്രീ ഏജന്റുമാര്‍ ജില്ലാ പൊലിസ് മേധാവിക്കും ഹൊസ്ദുര്‍ഗ് ഡി.വൈ.എസ്.പിക്കും പരാതി നല്‍കി. ഇരിങ്ങാലക്കുട ആസ്ഥാനമായി 10 വര്‍ഷം മുന്‍പാണ് ടി.എന്‍.ടി ചിട്ടി കമ്പനി പ്രവര്‍ത്തനമാരംഭിച്ചത്. ചിട്ടി കമ്പനി പൂട്ടിയതോടെ ചിറ്റാളന്മാരില്‍ നിന്നും പണം ശേഖരിച്ച ഏജന്റുമാരായ സ്ത്രീകള്‍ കേരളമാകെ വന്‍ ഭീഷണി നേരിടുകയാണ്. കഴിഞ്ഞ അഞ്ചു വര്‍ഷമായി ടി.എന്‍.ടി കമ്പനിയുടെ കാഞ്ഞങ്ങാട് ബ്രാഞ്ച് ഓഫിസ് പുതിയകോട്ട ടി.ബി റോഡ് ജങ്ഷനിലെ ഗണേഷ് ടവറിലായിരുന്നു പ്രവര്‍ത്തിച്ചിരുന്നത്. ഈ ഓഫിസ് ഡിസംബര്‍ 16നാണ് അടച്ചുപൂട്ടിയത്. പൂട്ടുന്നതിന് തലേ ദിവസം വരെ ഇവിടെ ചിട്ടി പണം നിക്ഷേപിച്ചവരുണ്ട്. മാസങ്ങളോളമായി കാഞ്ഞങ്ങാട് ബ്രാഞ്ചില്‍ നിക്ഷേപിച്ച ലക്ഷങ്ങള്‍ ഹെഡ് ഓഫിസില്‍ അടച്ചിട്ടില്ലെന്നാണ് ഏജന്റുമാര്‍ പറയുന്നത്. ചിറ്റാളന്മാരില്‍ നിന്നും പിരിച്ചെടുത്ത തുക കാഞ്ഞങ്ങാട് ബ്രാഞ്ചിലെ ഉദ്യോഗസ്ഥന്മാരായ സൗമ്യ, അഖില, രമ, ഷീജ, രേഷ്മ, സജിന എന്നിവര്‍ തട്ടിയെടുത്തിട്ടുണ്ടെന്നാണ് ഇവരുടെ പരാതി.