മൂവാറ്റുപുഴ: മൂവാറ്റുപുഴ നിയോജകമണ്ഡലത്തില്‍ ഡയറി സോണുകള്‍ ആരംഭിക്കുന്നതിന് ക്ഷീര വികസന വകുപ്പില്‍ നിന്നും 50ലക്ഷം രൂപ അനുവദിച്ചതായി എല്‍ദോ എബ്രഹാം എംഎല്‍എ അറിയിച്ചു.
പാല്‍ ഉല്‍പ്പാദനത്തില്‍ സ്വയംപര്യാപ്തത കൈവരിക്കുന്നതിന് ക്ഷീര വികസന വകുപ്പ് നടപ്പിലാക്കുന്ന പദ്ധതികളുടെ ഭാഗമായിട്ടാണ് സംസ്ഥാനത്ത് 50ബ്ലോക്കുകളില്‍ ഡയറി സോണുകള്‍ അനുവദിച്ചത്. മണ്ണിന്റെ ഘടനയും പ്രദേശത്തിന്റെ സ്വഭാവവും കണക്കിലെടുത്താണ് പദ്ധതിക്കായി ബ്ലോക്കുകളെ തെരഞ്ഞെടുക്കുന്നത്. ജില്ലയില്‍ മൂന്ന് ബ്ലോക്കുകളെയാണ് തെരഞ്ഞെടുത്തത്. പദ്ധതിയുടെ ഭാഗമായി ഒരു പശു വളര്‍ത്തുന്ന യൂണിറ്റിന് 32,000രൂപ ക്ഷിര വികസന വകുപ്പ് നല്‍കും. ഇതിനായി 25യൂണിറ്റുകളെ തെരഞ്ഞെടുക്കും. രണ്ട് പശു വളര്‍ത്തുന്ന യൂണിറ്റിന് 64,000രൂപ ക്ഷീരവികസന വകുപ്പ് നല്‍കും. ഇതിനായി 20യൂണിറ്റുകളെ തെരഞ്ഞെടുക്കും. അഞ്ച് പശു വളര്‍ത്തുന്ന യൂണിറ്റിന് 1.75 ലക്ഷം രൂപ ക്ഷീര വികസന വകുപ്പ് നല്‍കും. ഇതിനായി അഞ്ച് യൂണിറ്റുകളെ തെരഞ്ഞെടുക്കും. 10പശുവിന്റെ യൂണിറ്റുകള്‍ ആരംഭിക്കുന്നതിന് 3.50ലക്ഷം രൂപ ക്ഷീര വികസന വകുപ്പ് നല്‍കും. ഇതിനായി നാല് യൂണിറ്റുകളെ തെരഞ്ഞെടുക്കും. ഇതിന് പുറമെ തൊഴുത്ത് നിര്‍മിക്കാന്‍ 15പേര്‍ക്ക് 50.000രൂപ വീതവും നാല് പേര്‍ക്ക് കറവ യന്ത്രം വാങ്ങുന്നതിന് 25.000രപ വീതവും നല്‍കും.
തെരഞ്ഞെടുക്കുന്ന ഗുണഭോക്താവ് ചെലവഴിക്കുന്ന തുകയുടെ 50ശതമാനം സബ്‌സിഡിയായിട്ടാണ് ക്ഷീരവികസന വകുപ്പ് പദ്ധതിക്കായി തുക നല്‍കുന്നത്. ക്ഷീരവകസന വകുപ്പിന്റെ നേതൃത്വത്തില്‍ 201718 സാമ്പത്തീക വര്‍ഷത്തിലാണ് പദ്ധതി നടപ്പിലാക്കുന്നത്. ഇതിന് പുറമെ ക്ഷീരവികസന വകുപ്പിന്റെ ക്ഷീരഗ്രാമം പദ്ധതിയില്‍ കല്ലൂര്‍ക്കാട് ഗ്രാമപഞ്ചായത്തിനെ ഉള്‍പ്പെടുത്തുന്നതിനുള്ള നടപടികളും പൂര്‍ത്തിയായി വരുന്നതായി എല്‍ദോ എബ്രഹാം എംഎല്‍എ പറഞ്ഞു.