വാടാനപ്പള്ളി: വീട്ടമ്മയായ യുവതിയുടെ മോര്‍ഫ് ചെയ്ത നഗ്‌നചിത്രങ്ങള്‍ സാമൂഹിക മാധ്യമങ്ങളില്‍ പ്രചരിപ്പിക്കുമെന്നു ഭീഷണിപ്പെടുത്തി പത്തുലക്ഷം കവര്‍ന്ന നാലു യുവാക്കള്‍ അറസ്റ്റില്‍. വലപ്പാട് കോതകുളം സ്വദേശി കളിച്ചത്ത് വീട്ടില്‍ ആദിത്യന്‍, തളിക്കുളം സ്വദേശികളായ പെരുംതറ വീട്ടില്‍ ആദില്‍, മാനങ്ങത്ത് വീട്ടില്‍ അശ്വിന്‍, വലപ്പാട് സ്വദേശി വെന്നിക്കല്‍ വീട്ടില്‍ അജന്‍ എന്നിവരാണ് അറസ്റ്റിലായത്.
വീട്ടമ്മയില്‍നിന്ന് അരലക്ഷംരൂപ കൂടി തട്ടിയെടുക്കാനുള്ള നീക്കത്തിനിടെ പൊലിസ് തന്ത്രപരമായി ഇവരെ പിടികൂടുകയായിരന്നു. മൊബൈല്‍ ഫോണിലൂടെ സൗഹൃദം സ്ഥാപിച്ചാണ് നാലംഗ സംഘം വീട്ടമ്മയായ യുവതിയെ തട്ടിപ്പിനു ഇരയാക്കിയത്.
ചാറ്റിങ്ങിനിടെ യുവതിയുടെ ഫോട്ടോ സ്‌ക്രീന്‍ഷോട്ട് ചെയ്‌തെടുത്തായിരുന്നു മോര്‍ഫിങ്ങിന് ഉപയോഗിച്ചത്. പല തവണകളിലായി സ്വര്‍ണ്ണാഭരണങ്ങളും പണവും ഉള്‍പ്പെടെ പത്തുലക്ഷത്തോളം രൂപ യുവാക്കള്‍ കൈക്കലാക്കിയിരുന്നതായി പൊലിസ് വ്യക്തമാക്കിയിരുന്നു.
വലപ്പാട് എസ്.ഐമാരായ പി.സി ചാക്കോ, എന്‍.കെ ഉണ്ണികൃഷ്ണന്‍, എ.എസ്.ഐ കെ.എ ഹബീബ്, സി.പി.ഒമാരായ എ.വി വിനോഷ്, ടി.എസ് ശബരീഷ്, ജീജോ ജോസഫ്, അന്‍വര്‍ സാദത്ത് എന്നിവരുള്‍പ്പെട്ട സംഘമാണ് കേസ് അന്വേഷിച്ചത്.