ആയിരത്തിലധികം രൂപ നഷ്ടപ്പെട്ടു
പെരിന്തല്‍മണ്ണ: പെരുന്നാള്‍ അവധിയില്‍ പെരിന്തല്‍മണ്ണയിലും അങ്ങാടിപ്പുറത്തും മെഡിക്കല്‍ ഷോപ്പുകള്‍ കേന്ദ്രീകരിച്ച് കവര്‍ച്ചാ ശ്രമം. ആയിരത്തിലധികം രൂപ നഷ്ടപ്പെട്ടതായി പരാതി.
പെരിന്തല്‍മണ്ണ ജില്ലാശുപത്രിക്ക് എതിര്‍വശത്തെ ഹൗസിങ് കോളനി റോഡില്‍ ഡോക്ടര്‍മാരുടെ ക്ലിനിക്കുകള്‍ സ്ഥിതി ചെയ്യുന്ന സ്ഥലത്തെ നാല് മെഡിക്കല്‍ ഷോപ്പുകളിലും അങ്ങാടിപ്പുറത്തെ ജന്‍ഔഷധി ഷോപ്പിലുമായാണ് കവര്‍ച്ച നടന്നത്. ഷോപ്പുകളുടെ മുന്‍വശത്തെ ഷട്ടറുകളുടെ പൂട്ടുപൊളിച്ച് അകത്തുകടന്നാണ് മോഷണം.
അവധിയായതിനാല്‍ കടകളില്‍ കൂടുതല്‍ പണം സൂക്ഷിച്ചിട്ടില്ലായിരുന്നതിനാല്‍ കാര്യമായ നഷ്ടങ്ങളുണ്ടായില്ല. കോളനി റോഡില്‍ മോഷണം നടന്ന ഷോപ്പിന് സമീപത്തായുള്ള മറ്റൊരു കടയിലെ കാമറയില്‍ മോഷ്ടാക്കളുടെ ചിത്രം പതിഞ്ഞിട്ടുണ്ട്. വനിതാ എസ്.ഐയുടെ നേതൃത്വത്തില്‍ പെരിന്തല്‍മണ്ണ പൊലിസ് സ്ഥലത്തെത്തി സി.സി.ടി.വി ദൃശ്യങ്ങളില്‍ പരിശോധന നടത്തി. പ്രശ്‌ന പരിഹാരത്തിന് പെരിന്തല്‍മണ്ണയിലും അങ്ങാടിപ്പുറത്തും പൊലിസിന്റെ രാത്രികാല നിരീക്ഷണം ഏര്‍പ്പെടുത്തണമെന്ന് വ്യാപാരികള്‍ ആവശ്യപ്പെട്ടു.