തിരുവനന്തപുരം: സംസ്ഥാനത്തെ സ്‌കൂളുകളില്‍ പ്ലസ്‌വണ്‍ രണ്ടാം മുഖ്യ അലോട്ട്‌മെന്റ് ഇന്ന്. 80,016 സീറ്റുകളിലേക്കാണ് ഇന്ന് ഉച്ചയോടെ അലോട്ടുമെന്റ് നടത്തുക. ഒന്നാം ഘട്ടത്തില്‍ അലോട്ടുചെയ്ത സീറ്റുകളില്‍ 51,496 എണ്ണം വിവിധ കോമ്പിനേഷനുകളിലായി ഒഴിഞ്ഞുകിടക്കുകയാണ്. ഇവയിലേക്ക് ഉള്‍പ്പെടെയാണ് രണ്ടാം ഘട്ടത്തില്‍ അലോട്ട്‌മെന്റ്.
ഒന്നാംഘട്ടത്തില്‍ 2,38,033 സീറ്റുകളിലേക്കായിരുന്നു അലോട്ട്‌മെന്റ് നടന്നത്. ഇതില്‍ 1,17,107 സീറ്റുകളില്‍ വിദ്യാര്‍ഥികള്‍ സ്ഥിര പ്രവേശനം നേടി. 92,406 പേര്‍ ഹയര്‍ ഒപ്ഷന്‍ സാധ്യതകള്‍ തേടി താല്‍ക്കാലിക പ്രവേശനവും നേടിയിട്ടുണ്ട്. ഒന്നാം ഘട്ടത്തില്‍ അലോട്ട്‌മെന്റ് ലഭിച്ചവരില്‍ 28,520 പേര്‍ പ്രവേശനം നേടിയിട്ടില്ല. ഇവരെ രണ്ടാം ഘട്ടത്തില്‍ ഒഴിവാക്കും. രണ്ടാംഘട്ടത്തില്‍ പ്രവേശനം ലഭിക്കുന്നവര്‍ ചൊവ്വ, ബുധന്‍ ദിവസങ്ങളില്‍ അതത് സ്‌കൂളുകളില്‍ പ്രവേശനം നേടണം. പ്ലസ് വണ്‍ ക്ലാസുകള്‍ 21ന് ആരംഭിക്കും. തുടര്‍ന്ന് സ്‌കൂള്‍, കോമ്പിനേഷന്‍ ട്രാന്‍സ്ഫറുകള്‍ അനുവദിക്കും. പിന്നീട് സീറ്റുകള്‍ ഒഴിവ് വരുന്ന മുറയ്ക്ക് സപ്ലിമെന്ററി അലോട്ടുമെന്റുകള്‍ നടത്തുമെന്ന് ഹയര്‍ സെക്കന്‍ഡറി അക്കാദമിക് ജോയിന്റ് ഡയറക്ടര്‍ ഡോ. പി പി പ്രകാശന്‍ അറിയിച്ചു.