കൊല്‍ക്കത്ത: പശ്ചിമ ബംഗാളില്‍ കൊവിഡ് ബാധിച്ചുള്ള ഒരാളുടെ മരണം വിവാദമാകുന്നു. ആദ്യം കൊവിഡ് സ്ഥിരീകരിക്കുകയും പിന്നീട് രോഗമുക്തി നേടുകയും എന്നാല്‍ വൈകാതെ വീണ്ടും രോഗം സ്ഥിരീകരിക്കുകയും മരിക്കുകയും ചെയ്ത സംഭവത്തിലാണ് ആരോഗ്യവകുപ്പ് അന്വേഷണം പ്രഖ്യാപിച്ചിരിക്കുന്നത്. സംഭവത്തില്‍ ആശുപത്രി അധികൃതര്‍ക്കു വീഴ്ചയുണ്ടായതായി ആരോപണം ശക്തിപ്പെട്ടിട്ടുണ്ട്.

68കാരനായ ഓംപ്രകാശ് എന്നയാളാണ് കഴിഞ്ഞ ദിവസം മരിച്ചത്. കഴിഞ്ഞയാഴ്ചയാണ് ഓംപ്രകാശിന് കൊവിഡ് പരിശോധനയില്‍ പോസിറ്റീവെന്ന് ഫലം വന്നത്. തുടര്‍ന്ന് ബാങ്കൂരിലെ ആശുപത്രിയില്‍ അഡ്മിറ്റ് ചെയ്തു. എന്നാല്‍, നാലു ദിവസം കഴിഞ്ഞ് ആശുപത്രിയില്‍നിന്നു വിളിക്കുകയും പിതാവിന് പരിശോധനയില്‍ നെഗറ്റീവാണെന്നു തെളിഞ്ഞതായി അറിയിക്കുകയും ചെയ്തതായി മകന്‍ രാജ് ഗുപ്ത പറയുന്നു. തുടര്‍ന്ന് ഡിസ്ചാര്‍ജ് ചെയ്തു. വീട്ടിലെത്തിച്ചു. എന്നാല്‍, പിറ്റേന്ന് ആശുപത്രിയില്‍നിന്നു വീണ്ടും വിളിക്കുകയും പരിശോധനയില്‍ തെറ്റ് സംഭവിച്ചെന്നും കൊവിഡ് പോസിറ്റീവാണെന്ന് അറിയിക്കുകയും ചെയ്യുകയായിരുന്നു. തുടര്‍ന്ന് ആംബുലന്‍സില്‍ ആശുപത്രിയിലെത്തിച്ച ഓംപ്രകാശ് പിന്നീട് മരിക്കുകയായിരുന്നു.ചികിത്സയിലെ പിഴവ് ചൂണ്ടിക്കാട്ടി മകന്‍ പരാതി നല്‍കിയതോടെയാണ് ആരോഗ്യവകുപ്പ് അന്വേഷണം പ്രഖ്യാപിച്ചിരിക്കുന്നത്.