തൃശൂര്‍: അബൂദാബിയുടെ സാമൂഹികസാംസ്‌കാരിക മതവിദ്യാഭ്യാസ മേഖലകള്‍ക്ക് ഒരിക്കലും മറക്കാനാവാത്ത നാമമായിരുന്നു വിടപറഞ്ഞ പി.കെ അബ്ദുല്‍ കരീം ഹാജി തിരുവത്രയുടേത്. ബഹുമുഖമായ നിരവധി പ്രവര്‍ത്തനങ്ങളിലൂടെയാണ് അഞ്ചു പതിറ്റാണ്ട് നീണ്ട പ്രവാസ ജീവിതത്തെ കരീം ഹാജി സജീവമാക്കിയത്. ആത്മാര്‍ഥതയുടെയും ദൈവഭക്തിയുടെയും പ്രകടമായ ഉദാഹരണമായിരുന്നു അദ്ദേഹത്തിന്റെ കാല്‍വയ്പ്പുകള്‍. അബൂദാബിയിലെ മുസ്‌ലിം കൂട്ടായ്മകളുടെയെല്ലാം അമരത്ത് അദ്ദേഹം ഉണ്ടായിരുന്നു. ഒട്ടനവധി ദീനി സാമൂഹ്യ സേവനങ്ങളുടെ അമരക്കാരനായി ഇരിക്കാനും നിഷ്‌കളങ്ക സേവനം അര്‍പ്പിക്കാനും അദ്ദേഹത്തിനായി.
സമസ്ത പ്രസിഡന്റുമാരായിരുന്ന കെ.കെ അബൂബകര്‍ ഹസ്‌റത്ത്, സയ്യിദ് അബ്ദുറഹ്മാന്‍ ഇമ്പിച്ചിക്കോയ തങ്ങള്‍ ഐദറൂസി അല്‍ അസ്ഹരി തുടങ്ങിയ മഹാന്മാരോടോപ്പം സമസ്ത സ്ഥാപനങ്ങളും കൂട്ടായ്മകളും കെട്ടിപ്പടുക്കുന്നതിന് അഹോരാത്രം അദ്ദേഹം പരിശ്രമിച്ചു.
കോഴിക്കോട് ഇസ്‌ലാമിക് സെന്റര്‍ ആസ്ഥാനം യാഥാര്‍ഥ്യമാക്കാന്‍ ആദ്യശ്ശേരി ഹംസക്കുട്ടി മുസ്‌ലിയാര്‍, സെയ്തു മുഹമ്മദ് ഹാജി കൈപമംഗലം എന്നിവര്‍ക്കൊപ്പം അഹോരാത്രം പ്രയത്‌നിക്കാന്‍ അബൂദാബിയില്‍ അദ്ദേഹം സജീവമായിരുന്നു. 50 വര്‍ഷം മുന്‍പ് ഡ്രൈവറായി പ്രവാസ ജീവിതം ആരംഭിച്ച കരീം ഹാജി പിന്നീട് സ്വന്തമായ ബിസിനസിലേക്ക് തിരിയുകയായിരുന്നു.
ഒട്ടേറെ പേരുടെ ജീവിതത്തില്‍ കരീം ഹാജിയുടെ പ്രവര്‍ത്തനങ്ങള്‍ കാരുണ്യപ്പെയ്ത്തായിട്ടുണ്ട്. പ്രവാസ ജീവിതത്തില്‍ വീണു കിട്ടുന്ന ഇടവേളകളില്‍ നാട്ടിലെത്തിയാലും വെറുതെ ഇരിക്കാന്‍ അദ്ദേഹത്തിന് കഴിയുമായിരുന്നില്ല. സമസ്തയുടെയും മുസ്‌ലിം ലീഗിന്റെയും മറ്റനേകം കാരുണ്യ കൂട്ടായ്മയുടെയും മുന്നില്‍ നിന്ന് കൊണ്ട് അദ്ദേഹം പ്രവര്‍ത്തിച്ചു. അല്‍ റഹ്മാ ചാരിറ്റബിള്‍ ട്രസ്റ്റ് മുഖ്യരക്ഷാധികാരി, വെല്‍ഫെയര്‍ അസോസിയേഷന്‍ സ്ഥാപകന്‍, സമര്‍ഖന്ദ് ട്രസ്റ്റി, വാദിനൂര്‍ രക്ഷാധികാരി എന്നീ നിലയില്‍ നാട്ടിലും അദ്ദേഹം സജീവമായി ഇടപെട്ടുകൊണ്ടിരുന്നു.
ഒരു പ്രയാസം ശ്രദ്ധയില്‍പ്പെട്ടാല്‍ പിന്നെ അതു പരിഹരിക്കാതെ അദ്ദേഹത്തിന് വിശ്രമം ഉണ്ടായിരുന്നില്ല. സാമൂഹിക സാംസ്‌കാരിക ബിസിനസ് മേഖലകളിലെ ഒട്ടനവധി തര്‍ക്കങ്ങള്‍ കരീം ഹാജിയുടെ ശ്രമഫലമായി മധ്യസ്ഥതയില്‍ എത്തിക്കാന്‍ കഴിഞ്ഞിട്ടുണ്ട്.
റമദാന്റെ പടിവാതില്‍ക്കല്‍ ചെറിയ ആരോഗ്യ പ്രയാസം തോന്നി ആശുപത്രിയിലേക്ക് നീങ്ങുന്ന നിമിഷം വരെ കരീം ഹാജി മുഴുസമയം സേവന നിരതനായിരുന്നു. അബുദാബിയില്‍ കോവിഡ് രോഗവുമായി ബന്ധപ്പെട്ട് പ്രയാസപ്പെടുന്ന സഹോദരങ്ങള്‍ക്കായി സഹായം എത്തിക്കുന്നതിന് തീവ്ര ശ്രമത്തിലായിരുന്നു ആ മനുഷ്യസ്‌നേഹി.
സുന്നി സെന്റര്‍ കേന്ദ്രീകരിച്ച് ഭക്ഷണം എത്തിക്കാന്‍ മുന്‍പന്തിയില്‍ ഉണ്ടായിരുന്ന അദ്ദേഹത്തെ ശാരീരിക പ്രയാസങ്ങളെ തുടര്‍ന്നാണ് ആശുപത്രിയില്‍ പ്രവേശിപ്പിച്ചത്. അതിനിടയിലാണ് ഈ മഹാമാരി അദ്ദേഹത്തേയും പിടികൂടിയ വാര്‍ത്ത അറിയുന്നത്. കഴിഞ്ഞ ദിവസം സമസ്ത നേതാക്കള്‍ പ്രവാസ ലോകത്തെ വിവിധ നേതാക്കളുമായി നടത്തിയ വീഡിയോ കോണ്‍ഫറന്‍സില്‍ അബൂദാബിയെ പ്രതിനിധീകരിച്ച് പങ്കെടുത്തത് കരീം ഹാജിയായിരുന്നു.

വിടപറഞ്ഞത് മനുഷ്യ സ്‌നേഹിയായ പ്രവാസി;
മയ്യിത്ത് നിസ്‌കരിക്കുക: സമസ്ത നേതാക്കള്‍

കോഴിക്കോട് : പി.കെ അബ്ദുല്‍ കരീം ഹാജി തിരുവത്രയുടെ വിയോഗത്തോടെ നഷ്ടമായത് മറ്റുള്ളവര്‍ക്ക് വേണ്ടി തന്റെ ജീവിതം മാറ്റി വച്ച മനുഷ്യ സ്‌നേഹിയെ ആണെന്ന് സമസ്ത നേതാക്കളായ പാണക്കാട് സയ്യിദ് ഹൈദരലി ശിഹാബ് തങ്ങള്‍, സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍, പ്രൊഫ. കെ. ആലികുട്ടി മുസ്‌ലിയാര്‍, എം.ടി അബ്ദുല്ല മുസ്‌ലിയാര്‍ എന്നിവര്‍ അനുസ്മരിച്ചു. സമസ്തയുടെയും കീഴ്ഘടകങ്ങളുടെയും സമസ്തയുടെ സ്ഥാപനങ്ങളുടേയും വളര്‍ച്ചയ്ക്കു അദ്ദേഹം ചെയ്ത സേവനങ്ങള്‍ വില മതിക്കാനാവാത്തതാണ്. കരീം ഹാജിക്കായി പ്രാര്‍ഥന നടത്താനും മയ്യിത്ത് നിസ്‌കരിക്കാനും നേതാക്കള്‍ ആഹ്വാനം ചെയ്തു.