കോഴിക്കോട്: വെയിലത്ത് പണിയെടുക്കുന്ന തൊഴിലാളികള്‍ക്ക് ആശ്വാസമായി തൊഴില്‍ സമയം പുന:ക്രമീകരിച്ചതായി ജില്ലാ ലേബര്‍ ഓഫിസര്‍ വി.പി രാജന്‍ അറിയിച്ചു. സൂര്യാതപം ഏല്‍ക്കുന്നതിന് ഇടയുള്ളതിനാലാണ് ഏപ്രില്‍ 30 വരെ സമയം പുന:ക്രമീകരിച്ചിരിക്കുന്നത്.  പകല്‍ ഷിഫ്റ്റില്‍ ജോലി ചെയ്യുന്നവര്‍ക്ക് ഉച്ചയ്ക്ക് 12 മുതല്‍ മൂന്ന് വരെ വിശ്രമവേളയായിരിക്കും. ഇവരുടെ ജോലി സമയം രാവിലെ 7 മുതല്‍ വൈകിട്ട് 7 വരെയുളള സമയത്തിനുളളില്‍ 8 മണിക്കൂറായി നിജപ്പെടുത്തും.  രാവിലെയും ഉച്ചയ്ക്കുശേഷവുമുള്ള മറ്റ് ഷിഫ്റ്റുകളിലെ ജോലി സമയം ഉച്ചയ്ക്ക് 12 ന് അവസാനിക്കുന്ന പ്രകാരവും വൈകുന്നേരം 3 ന് ആരംഭിക്കുന്ന പ്രകാരവും പുന:ക്രമീകരിച്ചു. സെക്യൂരിറ്റി ജോലി ചെയ്യുന്ന ജീവനക്കാര്‍ക്ക് വെയില്‍ ഏല്‍ക്കാതെ ജോലി ചെയ്യുന്നതിനുളള സൗകര്യം അതത് സ്ഥാപനങ്ങള്‍ ഒരുക്കി നല്‍കണം. നിര്‍ദേശം കര്‍ശനമായി നടപ്പിലാക്കുന്നതിനായി ജില്ലയില്‍ അസിസ്റ്റന്റ് ലേബര്‍ ഓഫിസര്‍മാരുടെ സ്‌ക്വാഡ് രൂപീകരിച്ചിട്ടുണ്ട്. നിയമലംഘനം ശ്രദ്ധയില്‍പ്പെട്ടാല്‍ ജോലി പൂര്‍ണമായി നിര്‍ത്തിവയ്ക്കുന്നതുള്‍പ്പെടെയുള്ള കര്‍ശന നടപടികള്‍ സ്വീകരിക്കുമെന്നും ജില്ലാ ലേബര്‍ ഓഫിസര്‍ അറിയിച്ചു.

ആരെങ്കിലും പൊരിവെയിലത്ത് പണിയെടുക്കുന്നത് കണ്ട് നിങ്ങളുടെ ചങ്ക് പൊട്ടുന്നുണ്ടോ... എങ്കില്‍ വൈകാതെ തന്നെ ഈ നമ്പറിലേക്ക്
വിളിക്കൂ.... 0495- 2370538.