കാഞ്ഞിരപ്പള്ളി:കേരളത്തിലെ ക്രൈസ്തവ സഭകള്‍ക്ക് ഇന്ത്യയുടെ ഭരണഘടന ഉറപ്പു നല്‍കുന്ന മൗലിക അവകാശങ്ങള്‍ നിഷേധിക്കാനും സഭകളുടെ സ്ഥാപനങ്ങള്‍ സര്‍ക്കാര്‍ ഏജന്‍സികളെ ഉപയോഗിച്ച് പിടിച്ചെടുക്കുന്നതിനുമുള്ള ആസൂത്രിത നീക്കമാണ് കേരള നിയമപരിഷ്‌കരണ കമ്മീഷന്‍ കൊണ്ടുവന്ന ദി കേരള ചര്‍ച്ച് പ്രോപ്പര്‍ട്ടീസ് ആന്‍ഡ് ഇന്‍സ്ടിട്യൂഷന്‍ ബില്ലിന്റെ പിന്നിലെന്ന് കത്തോലിക്കാ കോണ്‍ഗ്രസ് കാഞ്ഞിരപ്പള്ളി രൂപതാ സമിതി ആരോപിച്ചു .ബില്ലിനെതിരേ ശക്തമായ പ്രക്ഷോഭ പരിപാടികള്‍ സംഘടിപ്പിക്കാന്‍ തീരുമാനിച്ചതായി രൂപതാ ഭാരവാഹികള്‍ അറിയിച്ചു. ഇതിന്റെ ആദ്യ ഘട്ടമായി മാര്‍ച്ചു മൂന്നാം തിയതി ഞായറാഴ്ച എല്ലാ ഇടവക യൂനിറ്റുകളുടെയും നേതൃത്വത്തില്‍ കരിദിനമായി ആചരിക്കും.യുനിറ്റ് കമ്മറ്റികളുടെ നേതൃത്വത്തില്‍ പ്രതിഷേധ സംഗമങ്ങള്‍ നടത്തി ചര്‍ച്ച് ബില്ലിന്റെ കോപ്പികള്‍ കത്തിക്കും .സര്‍ക്കാരിന് ഈ വിഷയത്തില്‍ എന്തെങ്കിലും ആത്മാര്‍ഥത ഉണ്ടെങ്കില്‍ പരസ്യമായി സഭാ വിരുദ്ധ നിലപാടുകള്‍ സ്വീകരിക്കുന്ന കമ്മീഷന്‍ അധ്യക്ഷന്‍ ഉള്‍പ്പടെയുള്ളവരെ പുറത്താക്കാന്‍ തയ്യാറാകണം. ദേവസ്വം ബോര്‍ഡ് , വഖഫ് ബോര്‍ഡ് തുടങ്ങിയവക്ക് സമാനമാകണം കത്തോലിക്കാ സ്ഥാപനങ്ങളും എന്ന് നിര്‍ദ്ദേശിക്കുന്ന ഒരു നിയമ ഭേദഗതിയെയും അംഗീകരിക്കാന്‍ വിശ്വാസികള്‍ക്ക് കഴിയില്ല എന്നും, ഇതിനെ പ്രതിരോധിക്കാന്‍ ഏതറ്റവും വരെ പോകാന്‍ കത്തോലിക്കാ കോണ്‍ഗ്രസ് തയ്യാറാണ് എന്നും ഭാരവാഹികള്‍ അറിയിച്ചു .