റിയാദ്: രാജ്യത്തെ പൗരന്മാര്‍ക്ക് ഏറെ താല്‍പര്യമുള്ള മേഖലകളില്‍ പ്രത്യേകം സഊദിവല്‍ക്കരണം നടപ്പാക്കി കൂടുതല്‍ സ്വദേശികള്‍ക്ക് തൊഴില്‍ നല്‍കാനുള്ള പദ്ധതിയുമായി സഊദി തൊഴില്‍ സാമൂഹിക വികസന മന്ത്രാലയം രംഗത്ത്. സ്വദേശി പൗരന്മാര്‍ക്ക് കൂടുതല്‍ താല്‍പര്യമുള്ള, ആകര്‍ഷകമായ മേഖലകളില്‍ സഊദിവല്‍ക്കരണം നടപ്പാക്കുന്നതിന് സ്വകാര്യ കമ്പനികളെ ലക്ഷ്യമാക്കിയാണ് പുതിയ പദ്ധതികള്‍ ആവിഷ്‌കരിക്കുന്നത്. തങ്ങള്‍ക്ക് ഏറ്റവും ആകര്‍ഷകമായ തൊഴില്‍ ലഭിക്കാത്തതിനാല്‍ തൊഴില്‍ മേഖലയിലേക്ക് കടന്നു വരാത്ത സഊദികളെ ലക്ഷ്യമാക്കിയാണ് മന്ത്രാലയത്തിന്റെ പുതിയ നീക്കം.

സഊദികള്‍ക്ക് ആകര്‍ഷകമായ തൊഴില്‍ മേഖലകളില്‍ നിശ്ചിത ശതമാനം സഊദിവല്‍ക്കരണം നിര്‍ണയിച്ച് സ്വദേശിവല്‍ക്കരണം വര്‍ധിപ്പിക്കുന്നതിനാണ് പുതിയ പദ്ധതിയിലൂടെ ലക്ഷ്യമിടുന്നത്. യോഗ്യരായ സഊദി പൗരന്മാര്‍ക്കും പുതുതായി ബിരുദം നേടി പുറത്തിറങ്ങുന്നവര്‍ക്കും സഊദിവല്‍ക്കരണ പദ്ധതിയുമായി സഹകരിക്കുന്ന സ്ഥാപനങ്ങള്‍ക്കും പുതിയ പദ്ധതി ഉപകാരപ്പെടുമെന്ന് തൊഴില്‍, സാമൂഹിക വികസന മന്ത്രാലയം വ്യക്തമാക്കി. സ്വകാര്യ മേഖലയില്‍ സഊദിവല്‍ക്കരണം കൂടുതല്‍ പ്രോത്സാഹിപ്പിക്കുന്നതിനുള്ള പദ്ധതികളുടെ ഭാഗമായാണ് പുതിയ നീക്കം.

പദ്ധതി നടപ്പാക്കുന്നതിന് സഹകരിക്കുന്ന സ്ഥാപനങ്ങള്‍ക്ക് തൊഴില്‍, സാമൂഹിക വികസന മന്ത്രാലയവും അനുബന്ധ സ്ഥാപനങ്ങളും സഹായങ്ങളും പ്രോത്സാഹനങ്ങളും നല്‍കും. മാനവശേഷി വികസന നിധി, ജനറല്‍ ഓര്‍ഗനൈസേഷന്‍ ഫോര്‍ സോഷ്യല്‍ ഇന്‍ഷുറന്‍സ്, സാമൂഹിക വികസന ബാങ്ക് അടക്കമുള്ള സ്ഥാപനങ്ങളുമായി സഹകരിച്ച് പദ്ധതി വിജയിപ്പിക്കുന്നതിന് പ്രവര്‍ത്തിക്കുമെന്ന് തൊഴില്‍, സാമൂഹിക വികസന മന്ത്രാലയം പറഞ്ഞു. മന്ത്രാലയത്തിന്റെ പുതിയ നീക്കം വിദേശികള്‍ക്ക് തിരിച്ചടിയാകും.