കൊച്ചി: ഗള്‍ഫ് രാജ്യങ്ങളില്‍ നിന്നുള്ള പ്രവാസികളെ കടല്‍മാര്‍ഗം ഒഴിപ്പിച്ചു കൊണ്ടുവരാനുള്ള തീരുമാനം നീളുന്നു. അതേസമയം മാല ദ്വീപില്‍ നിന്നുള്ള പ്രവാസികളുടെ ആദ്യ സംഘവുമായി രണ്ടു നാവികസേന യുദ്ധക്കപ്പലുകള്‍ അടുത്തയാഴ്ചയോടെ എത്തുമെന്നും നാവികസേന അധികൃതര്‍ 'സുപ്രഭാത'ത്തോട് പറഞ്ഞു. ഈ കപ്പലുകള്‍ നാളെ അവിടെ നിന്നും പുറപ്പെടും.
ദുബൈയിലേക്ക് പോയ കപ്പലുകള്‍ക്ക് അവിടെ നങ്കൂരമിടാന്‍ അനുവാദം ലഭിച്ചില്ലെന്ന തരത്തിലുള്ള വാര്‍ത്തകള്‍ അടിസ്ഥാനമില്ലാത്തതാണെന്നും കൊച്ചി ആസ്ഥാനമായ ദക്ഷിണ നാവികസേന കമാന്‍ഡ് വിശദീകരിച്ചു.
ഉള്‍ക്കടലില്‍ പരിശീലനത്തിലേര്‍പ്പെട്ടിരുന്ന ഇന്ത്യന്‍ യുദ്ധക്കപ്പലുകള്‍ക്ക് ഗള്‍ഫ്, മാല ദ്വീപ് എന്നിവിടങ്ങളില്‍ നിന്നുള്ള പ്രവാസികളെ ഒഴിപ്പിച്ചുകൊണ്ടുവരാന്‍ നിര്‍ദേശം ലഭിച്ചിരുന്നു. നിര്‍ദേശം അനുസരിച്ച് കപ്പലുകള്‍ പുറപ്പെട്ടിട്ടുണ്ടെന്നും ഗള്‍ഫ് രാജ്യങ്ങളിലെ സര്‍ക്കാരുകളും ഇന്ത്യന്‍ സര്‍ക്കാരും ചേര്‍ന്നെടുക്കുന്ന തീരുമാനത്തിനനുസരിച്ചാണ് പദ്ധതി ആസൂത്രണം ചെയ്തിരിക്കുന്നതെന്നും നാവികസേനാ അധികൃതര്‍ വ്യക്തമാക്കി.
കടല്‍പ്പാലം എന്നര്‍ഥം വരുന്ന 'സമുദ്ര സേതു' എന്നാണ് പ്രവാസികളെ കടല്‍മാര്‍ഗം ഒഴിപ്പിച്ചു കൊണ്ടുവരാനുള്ള പദ്ധതിക്ക് നാവികസേന പേരിട്ടിരിക്കുന്നത്. സേനയുടെ പശ്ചിമ കമാന്‍ഡിനാണ് ചുമതല. ഇതിന്റെ ആദ്യ ഘട്ടമായാണ് ജലാശ്വ, മഗര്‍ എന്നീ യുദ്ധക്കപ്പലുകള്‍ മാല ദ്വീപിലേക്ക് പോയത്.