നിലമ്പൂര്‍: വിദ്യാര്‍ഥികളില്‍ കഞ്ചാവ് വില്‍ക്കുന്നവരുടെയും ഉപയോഗിക്കുന്നവരുടെയും എണ്ണം വര്‍ധിച്ചുവരുന്ന സാഹചര്യത്തില്‍ രക്ഷിതാക്കള്‍ കൂടുതല്‍ ജാഗ്രത കാണിക്കണമെന്ന് പൊലിസും, എക്‌സൈസും. നിലമ്പൂരില്‍ പൊലിസ് കഴിഞ്ഞ ദിവസം പിടികൂടിയ കാസര്‍കോട് സ്വദേശികളില്‍നിന്നും ഞെട്ടിക്കുന്ന വിവരങ്ങളാണ് പൊലിസിന് ലഭിച്ചത്.
മേഖലയില്‍ നിരവധി വിദ്യാര്‍ഥികളാണ് കഞ്ചാവ് മാഫിയയുമായി നിരന്തരം ബന്ധപ്പെടുന്നത്. നാലു വര്‍ഷം കൊണ്ട് നിലമ്പൂരില്‍ പതിനഞ്ചോളം വിദ്യാര്‍ഥികള്‍ കഞ്ചാവുമായി പൊലിസിന്റെയും എക്‌സൈസിന്റെയും പിടിയിലായിട്ടുണ്ട്.
സ്‌കൂളുകള്‍ കേന്ദ്രീകരിച്ച് എക്‌സൈസ് വകുപ്പ് ബോധവല്‍ക്കരണവും മറ്റും നടത്തുന്നുണ്ടെങ്കിലും ഈ വിഷയത്തില്‍ രക്ഷിതാക്കളുടെ കരുതല്‍ കൂടി ഉണ്ടെങ്കില്‍ മാത്രമേ സ്‌കൂളുകളില്‍ നിന്നും ലഹരി മാഫിയയെ പുറത്താക്കാന്‍ കഴിയൂ. കുട്ടികളെ ഇടനിലക്കാരാക്കി കഞ്ചാവ് മാഫിയ വന്‍ ബിസിനസാണ് നടത്തുന്നത്. ഒന്‍പത്, പത്ത് ക്ലാസുകളില്‍ പഠിക്കുന്ന കുട്ടികളാണ് പിടിയിലായത്. ഇവരുടെ രക്ഷിതാക്കളെ വിളിച്ചുവരുത്തി ബോധവല്‍ക്കരണം നല്‍കി മടക്കിയയക്കുകയായിരുന്നു. സ്‌കൂള്‍ പരിസരങ്ങളില്‍ അപരിചിതരായി എത്തുന്നവരെ നിരീക്ഷിക്കേണ്ടത് അധ്യാപകരുടെയും കുട്ടികളുടെയും ചുമതലയായി മാറണം.
ഇത്തരം ആളുകളെ കണ്ടാല്‍ വിദ്യാര്‍ഥികള്‍ അധ്യാപകരെയും രക്ഷിതാക്കളെയും വിവരമറിയിക്കണം. നിലമ്പൂര്‍ മേഖലയിലെ ഹയര്‍ സെക്കന്‍ഡറി സ്‌കൂളുകള്‍, ഹയര്‍ സെക്കന്‍ഡറി സ്‌കൂളുകള്‍, കോളജുകള്‍ എന്നിവ കേന്ദ്രീകരിച്ചാണ് കുട്ടികളെ ഉപയോഗിച്ച് മാഫിയകള്‍ ലഹരി വില്‍പന നടത്തുന്നത്.
കുട്ടികളില്‍ ഉണ്ടാകുന്ന സ്വഭാവവ്യതിയാനം രക്ഷിതാക്കള്‍ ശ്രദ്ധാപൂര്‍വം വീക്ഷിക്കേണ്ടത് അനിവാര്യമാണ്. തുടക്കത്തില്‍ തന്നെ ലഹരി ഉപയോഗത്തിന് തടയിടാനായില്ലെങ്കില്‍ കുട്ടികളുടെ ഭാവി തന്നെ കൈവിട്ടുപോകും.
പൊതുപരിപാടികളില്‍ ക്ഷണിച്ചാല്‍ ലഹരി ഉപയോഗത്തിന്റെ വിപത്തുകള്‍ ബോധ്യപ്പെടുത്തുന്നതിന് എക്‌സൈസ് വകുപ്പും പൊലിസും രംഗത്തിറങ്ങുന്നുണ്ട്.