നന്തിബസാര്‍: എല്‍.പി ഗ്യാസ് ഗോഡൗണില്‍ സിലിണ്ടര്‍ ലീക്കായതിനെ തുടര്‍ന്ന് ജനം പരിഭ്രാന്തരായി. വടകരയില്‍ നിന്നെത്തിയ ഫയര്‍ ഫോഴ്‌സ് ലീക്കായ സിലിണ്ടറുകള്‍ മാറ്റി. ഇന്നലെ ഉച്ചയ്ക്ക് ഒരുമണിയോടെ മൂടാടി ഹില്‍ബസാറിലെ കാവ്യ ഇന്ധന്‍ ഗ്യാസ് ഏജന്‍സിയുടെ ഗോഡൗണിലാണ് സിലിണ്ടറുകള്‍ ചോര്‍ന്നത്.
ഉടനെ നാട്ടുകാര്‍ പൊലിസിലും ഫയര്‍ഫോഴ്‌സിലും വിവരമറിയിച്ചതിനെ തുടര്‍ന്ന് കൊയിലാണ്ടി എസ്.ഐ വി.എം മോഹന്‍ദാസിന്റെ നേതൃത്വത്തില്‍ പൊലിസും വടകരയില്‍ നിന്ന് ഫയര്‍ഫോഴ്‌സിന്റെ ഒരു യൂനിറ്റുമെത്തുകയായിരുന്നു. തീ കെടുത്താന്‍ മണ്ണുനിറച്ചു വയ്‌ക്കേണ്ട ബക്കറ്റുകള്‍ അടിഭാഗം തകര്‍ന്ന നിലയിലാണ്. വേണ്ടത്ര കാറ്റ് കടക്കാത്ത ഗോഡൗണിലാണ് നൂറുകണക്കിന് സിലിണ്ടറുകള്‍ സൂക്ഷിച്ചിരിക്കുന്നത്. മൂടാടി പഞ്ചായത്ത് പ്രസിഡന്റ് ഷീജ പട്ടേരി സ്ഥലം സന്ദര്‍ശിച്ചു.