തിരൂരങ്ങാടി: വയലില്‍ കഞ്ചാവ് കൃഷി നടത്തിയ കേസില്‍ യുവാവിനെ എക്‌സൈസ് സംഘം അറസ്റ്റ് ചെയ്തു.
     തൃക്കുളം കോട്ടുവാലക്കാട് കുന്നത്തേരില്‍ ഹബീബ് റഹ്മാനെ (24) യാണ് തിരൂരങ്ങാടി എക്‌സൈസ് സി.ഐ എം. രാഗേഷും സംഘവും ഇന്നലെ വീട്ടില്‍വച്ച് അറസ്റ്റ് ചെയ്തത്.
കഴിഞ്ഞ മാസം രണ്ടിനാണ് കോട്ടുവാലക്കാട് നൂറ്റിരുത്തി ശ്മാശാനത്തിനു സമീപം വയലില്‍  നാലു മാസത്തോളം പ്രായമുള്ള ഏഴു കഞ്ചാവ് ചെടികള്‍ എക്‌സൈസ് സംഘം കണ്ടെത്തിയിരുന്നത്. കഞ്ചാവ് ചെടികള്‍ കസ്റ്റഡിയിലെടുത്ത് എക്‌സൈസ് സംഘം മടങ്ങിയെങ്കിലും ഒരു മാസത്തിലേറെയായി എക്‌സൈസിന്റെ നിരീക്ഷണത്തിനൊടുവിലാണ് പ്രതി പിടിയിലായത്.
മരംവെട്ടു തൊഴിലാളിയാണ് ഹബീബ് റഹ്മാന്‍. കൗതുകത്തിനുവേണ്ടി ചെയ്തതാണെന്നാണ് പ്രതിയുടെ വാദം.
എക്‌സൈസ് സി.ഐ രാഗേഷ്, അസി. എക്‌സൈസ് ഇന്‍സ്‌പെക്ടര്‍ വി.പി ഭാസ്‌കരന്‍, പ്രിവന്റീവ് ഓഫിസര്‍ സുര്‍ജിത്ത്, സിവില്‍ എക്‌സൈസ് ഓഫിസര്‍മാരായ അജു, ചന്ദ്രമോഹന്‍ എന്നിവരാണ് പ്രതിയെ പിടികൂടിയത്. വടകര നര്‍ക്കോട്ടിക് കോടതിയില്‍ ഹാജരാക്കിയ പ്രതിയെ 24വരെ റിമാന്‍ഡ് ചെയ്തു.