മഞ്ചേരി: കാവനൂരില്‍ ജ്വല്ലറി കുത്തിത്തുറന്ന് അഞ്ചുപവന്‍ സ്വര്‍ണം കവര്‍ന്നകേസിലെ പ്രതിയെ മഞ്ചേരി പൊലിസ് അറസ്റ്റ് ചെയ്തു. മാനന്തവാടി വെള്ളമുണ്ട കൊട്ടാരത്തു പള്ളിക്കുന്നുമ്മല്‍ ഷമീറി(30)നെയാണ് എസ്.ഐ എസ്.ബി കൈലാസ് നാഥിന്റെ നേതൃത്വത്തില്‍ ഇന്നലെ കല്‍പ്പറ്റയിലെ ലോഡ്ജില്‍ വെച്ചു പിടികൂടിയത്. നഷ്ടപ്പെട്ട സ്വര്‍ണത്തില്‍ മൂന്നുപവന്‍ കണ്ടെത്തി. കാവനൂര്‍ പരിയാരക്കല്‍ രമേശന്റെ ഉടമസ്ഥതയിലുളള ആഭരണക്കടയില്‍ ജൂണ്‍ ആറിനു രാത്രിയിലാണു മോഷണം നടന്നത്. സമീപത്തെ കടകളിലെ സി.സി.ടി.വിയില്‍ നിന്നാണു പ്രതിയെ തിരിച്ചറിഞ്ഞത്. കടയുടെ 200 മീറ്റര്‍ അകലെ വാടകമുറിയില്‍ താമസിക്കുകയായിരുന്നു ഷമീര്‍. പെയിന്റിംഗ് തൊഴിലിനാണു കാവനൂരിലെത്തിയത്. ഇയാള്‍ക്കെതിരേ മുമ്പു കേസുകളൊന്നും നിലവിലില്ലെന്നു പൊലിസ് പറഞ്ഞു. അരീക്കോട് എ.എസ്.ഐ എ. മുഹമ്മദ്, സി.പി.ഒമാരായ ടി.ശ്രീകുമാര്‍, പി.സഞ്ജീവ്, ഉണ്ണികൃഷ്ണന്‍ മാരാത്ത്, സുരേഷ് എന്നിവരുടെ നേതൃത്വത്തിലാണു പ്രതിയെ പിടികൂടിയത്.