പേരാമ്പ്ര: ചങ്ങരോത്ത് പഞ്ചായത്തിലെ കല്ലൂര്‍ക്കാവ് വയലില്‍ നെല്‍കൃഷിയിറക്കിയ കര്‍ഷകര്‍ വെട്ടിലായി. വയലില്‍ വെള്ളം നിറഞ്ഞതിനാല്‍ നെല്ല് കൊയ്‌തെടുക്കാന്‍ കര്‍ഷകര്‍ ബുദ്ധിമുട്ടുകയാണ്. കുറ്റ്യാടി ജലസേചന പദ്ധതിയുടെ ഭാഗമായ കല്ലൂര്‍ ബ്രാഞ്ച് കനാലില്‍ നിന്നുള്ള വെള്ളം പാട്ടത്തിനെടുത്ത നാലര ഏക്കര്‍ വയലില്‍ കെട്ടിനില്‍ക്കുകയാണ്.
കഴിഞ്ഞ ദിവസമുണ്ടായ കാറ്റില്‍ വിളഞ്ഞ നെല്‍ച്ചെടികള്‍ പൂര്‍ണമായും വെള്ളത്തില്‍ മുങ്ങി. കതിരുകള്‍ പലതും ഇതോടെ മുളയ്ക്കാനും തുടങ്ങിയിട്ടുണ്ട്. കൈക്കനാലിലെ ജലത്തിന്റെ തോത് പത്തു ദിവസത്തേക്ക് താഴ്ത്തിക്കിട്ടിയാല്‍ പ്രശ്‌നത്തിനു പരിഹാരമാകുമെന്നാണ് ഇവിടെ പാട്ടക്കൃഷിക്കെത്തിയവര്‍ പറയുന്നത്. ഈ ആവശ്യം ഇവര്‍ ബന്ധപ്പെട്ട ഉദ്യോഗസ്ഥരെ അറിയിച്ചെങ്കിലും ഒരു നടപടിയുമുണ്ടാകുന്നില്ലെന്നു കര്‍ഷകര്‍ പറഞ്ഞു. നാലര ഏക്കര്‍ സ്ഥലത്തു നെല്‍കൃഷി ചെയ്യാന്‍ ഇതുവരെ ഒരു ലക്ഷത്തോളം രൂപ ചെലവായിട്ടുണ്ട്. നെല്ല് വെള്ളത്തിലായതിനാല്‍ കൊയ്‌തെടുക്കല്‍ പ്രയാസമനുഭവിക്കുകയാണ്.