യുനൈറ്റഡ് നാഷന്‍സ്: തങ്ങളെ ഭീകര സംഘടനയില്‍ ഉള്‍പ്പെടുത്തിയ നടപടി റദ്ദാക്കണമെന്നാവശ്യപ്പെട്ട് ജമാഅത്തുദ്ദഅ്‌വ നേതാവ് ഹാഫിസ് സഈദ് നല്‍കിയ അപേക്ഷ ഐക്യരാഷ്ട്രസഭ തള്ളി.
ജെയ്ഷ് മേധാവി മസൂദ് അസ്ഹറിനു നിരോധനമേര്‍പ്പെടുത്തണമെന്നാവശ്യപ്പെട്ട് ഇന്ത്യ നല്‍കിയ അപേക്ഷ യു.എന്‍ ഉപരോധസമിതി മുന്‍പാകെ ലഭിച്ചതിനു പിന്നാലെയാണ് ഹാഫിസ് സഈദിന്റെ അപേക്ഷ തള്ളിയിരിക്കുന്നത്. മുംബൈ ഭീകരാക്രമണത്തില്‍ ഇന്ത്യ പിടികിട്ടാപ്പുള്ളിയായി പ്രഖ്യാപിച്ചയാളാണ് ഹാഫിസ് സഈദ്.

അതേസമയം, ലശ്കറെ ത്വയ്ബ നേതാവ് കൂടിയായ ഹാഫിസ് സഈദിനെ ചോദ്യംചെയ്യാനുള്ള യു.എന്‍ നീക്കം പാകിസ്താന്‍ തടഞ്ഞു. ഹാഫിസിനെ ചോദ്യംചെയ്യാന്‍ വിസ അനുവദിക്കണമെന്നാവശ്യപ്പെട്ട് ന്യൂയോര്‍ക്കിലെ കോണ്‍സുലേറ്റില്‍ നല്‍കിയ അപേക്ഷ പാകിസ്താന്‍ തള്ളുകയായിരുന്നു. ഉപരോധം ഏര്‍പ്പെടുത്തേണ്ടവരുടെ പട്ടികയില്‍നിന്നു തന്റെ പേര് നീക്കം ചെയ്യണമെന്നാവശ്യപ്പെട്ട് ഹാഫിസ് സഈദ് പുതിയ അപേക്ഷ നല്‍കിയിരുന്നു.

പട്ടികയില്‍നിന്ന് ആരെയെങ്കിലും നീക്കംചെയ്യുകയാണെങ്കില്‍ ആ വ്യക്തിയെ ആദ്യം അഭിമുഖം നടത്തുന്നതാണ് യു.എന്നിന്റെ രീതി. അതിനാല്‍ വിസാ അപേക്ഷ തള്ളിയതോടെ ഹാഫിസിനെ അഭിമുഖം നടത്താനുള്ള സാഹചര്യമാണ് ഇല്ലാതായിരിക്കുന്നത്.