ന്യൂഡല്‍ഹി: പാകിസ്താനിലെ ഇന്ത്യന്‍ ഹൈകമിഷണര്‍ക്ക് ആരാധനാ വിലക്ക്.പാകിസ്താനിലെ ഹസന്‍ അബ്ദലിലെ പഞ്ജാ സാഹിബിന്റെ ഗുരുദ്വാര സന്ദര്‍ശിക്കാനെത്തിയ അജയ് ബിസാരിയയെയാണ് തടഞ്ഞത്. ഇതേതുടര്‍ന്ന് ബിസാരിയയും ഭാര്യയും ഗുരുദ്വാര സന്ദര്‍ശിക്കാതെ മടങ്ങി. സംഭവം ഇന്ത്യന്‍ വിദേശകാര്യ മന്ത്രാലയം പാക് വിദേശകാര്യ മന്ത്രാലയത്തിന്റെ ശ്രദ്ധയില്‍പെടുത്തിയിട്ടുണ്ട്. 1974ലെ ഇന്ത്യ പാക് കരാര്‍ അനുസരിച്ച് പാകിസ്താനിലെ മതകേന്ദ്രങ്ങളിലേക്ക് ഇന്ത്യയില്‍ നിന്നുള്ള തീര്‍ത്ഥാടകര്‍ക്ക് ഉത്സവ സീസണുകളില്‍ സന്ദര്‍ശനം അനുവദിക്കാറുണ്ട്. ജൂണ്‍ 21 മുതല്‍ 30വരെ നീളുന്ന മഹാരാജ രഞ്ജിത് സിംഗിന്റെ ചരമവാര്‍ഷികത്തില്‍ പങ്കെടുക്കാന്‍ ദേരാ സാഹിബ് ഗുരുദ്വാരയിലേക്ക് 300 ഇന്ത്യന്‍ തീര്‍ത്ഥാടകര്‍ക്ക് പാകിസ്താന്‍ വിസ അനുവദിച്ചിരുന്നു.