ന്യൂഡല്‍ഹി: 29 വര്‍ഷം മുമ്പ് മയക്കുമരുന്ന് പിടികൂടിയ സംഭവത്തില്‍ തനിക്കെതിരേ രജിസ്റ്റര്‍ ചെയ്ത കേസ് റദ്ദാക്കണമെന്നാവശ്യപ്പെട്ട് മുന്‍ ഐ.പി.എസ് ഓഫിസര്‍ സഞ്ജീവ് ഭട്ട് സുപ്രിംകോടതിയെ സമീപിച്ചു. ഹരജി ഇന്നലെ ജസ്റ്റിസുമാരായ ജെ.കെ മഹേശ്വരി, വിജയ് ബിഷ്‌ണോയ് എന്നിവരടങ്ങിയ ബെഞ്ച് മുമ്പാകെ എത്തിയെങ്കിലും ഭട്ടിന് വേണ്ടി ഹാജരായ അഭിഭാഷകന്‍ കപില്‍ സിബലിന്റെ അഭ്യര്‍ത്ഥന മാനിച്ച് ഹരജി മറ്റൊരു ദിവസത്തേക്ക് മാറ്റിവച്ചു.

1996 ല്‍ ഗുജറാത്തിലെ പാലന്‍പൂരില്‍ നിന്ന് മയക്കുമരുന്ന് പിടികൂടിയ കേസില്‍ കഴിഞ്ഞവര്‍ഷമാണ് സെഷന്‍സ് കോടതി ഭട്ടിനെ 20 വര്‍ഷം തടവിന് ശിക്ഷിച്ചത് എസ്.പിയായിരിക്കെ രാജസ്ഥാന്‍ സ്വദേശിയായ അഭിഭാഷകന്‍ സുമര്‍സിങ് രാജ്പുരോഹിത് താമസിച്ച ഹോട്ടല്‍മുറിയില്‍ നിന്ന് മയക്കുമരുന്ന് പിടികൂടിയിരുന്നു. ഇത് വ്യാജമാണെന്ന പരാതിയിലാണ് ഭട്ട് ഇപ്പോള്‍ ശിക്ഷയനുഭവിക്കുന്നത്. 1990 ലെ മറ്റൊരു കസ്റ്റഡി മരണ കേസില്‍ ഭട്ട് ഇതിനകം ജീവപര്യന്തം തടവ് അനുഭവിക്കുകയാണ്. 2002ലെ ഗുജറാത്ത് കൂട്ടക്കൊലയില്‍ അന്നത്തെ മുഖ്യമന്ത്രി നരേന്ദ്രമോദിയുടെ പങ്ക് വെളിപ്പെടുത്തിയതു മുതല്‍ ഭട്ടിനെതിരേ ബി.ജെ.പി സര്‍ക്കാര്‍ പ്രതികാരനടപടി സ്വീകരിക്കുകയാണെന്ന ആക്ഷേപം ശക്തമാണ്.