വാഷിങ്ടണ്‍: ഇറാനും അഫ്ഗാനിസ്ഥാനുമുള്‍പ്പെടെ 19 രാജ്യങ്ങളില്‍ നിന്നുള്ള കുടിയേറ്റ അപേക്ഷകള്‍ക്കു വിലക്കേര്‍പ്പെടുത്തി യു.എസ്. സുരക്ഷാ കാരണങ്ങളാല്‍ യു.എസിലേക്ക് പ്രവേശനവിലക്കുള്ള, യൂറോപ്പിനു പുറത്തെ രാജ്യങ്ങളില്‍ നിന്നുള്ളവര്‍ക്കാണ് ട്രംപ് ഭരണകൂടം കുടിയേറ്റ വിലക്ക് ഏര്‍പ്പെടുത്തിയിരിക്കുന്നത്. ഈ രാജ്യക്കാര്‍ക്ക് യു.എസ് പൗരത്വമോ ഗ്രീന്‍ കാര്‍ഡോ നല്‍കുകയുമില്ല.

കഴിഞ്ഞയാഴ്ച രണ്ടു അമേരിക്കന്‍ ദേശീയ ഗാര്‍ഡ് സൈനികര്‍ക്കു നേരെ ഒരു അഫ്ഗാന്‍ പൗരന്‍ വെടിയുതിര്‍ത്ത സാഹചര്യത്തിലാണ് നടപടി. വെടിയേറ്റ് ഒരു സൈനിക കൊല്ലപ്പെട്ടിരുന്നു. മറ്റേയാള്‍ ആശുപത്രിയില്‍ ചികിത്സയിലാണ്. പിടിയിലായ അക്രമിക്കെതിരേ കൊലക്കുറ്റം ഉള്‍പ്പെടെ വിവിധ വകുപ്പുകള്‍ ചുമത്തിയിട്ടുണ്ട്. മ്യാന്മര്‍, ലിബിയ, സുദാന്‍, യമന്‍, ക്യൂബ, വെനസ്വേല തുടങ്ങിയവ വിലക്കുള്ള രാജ്യങ്ങളില്‍ പെടുന്നു. അതേസമയം, വിലക്ക് നിലവില്‍വരുന്നതിനു മുമ്പ് ഈ രാജ്യങ്ങളില്‍ നിന്ന് യു.എസിലെത്തിയവര്‍ക്ക് വിലക്ക് ബാധകമല്ല.