പൂക്കോട്ടുംപാടം: അമരമ്പലം സൗത്ത് ക്ഷേത്രത്തിനു സമീപം വീണ്ടും കക്കൂസ് മാലിന്യങ്ങള്‍ തള്ളിയതായി പരാതി.
തിങ്കളാഴ്ച രാവിലെയാണ് നാട്ടുകാര്‍ റോഡരികില്‍ കക്കൂസ് മാലിന്യങ്ങള്‍ തള്ളിയതായി കണ്ടെത്തിയത്.
കഴിഞ്ഞ മാസവും ഇതേ സ്ഥലത്ത് കക്കൂസ് മാലിന്യങ്ങള്‍ തള്ളിയത് പഞ്ചായത്ത് അധികൃതര്‍ ഇടപ്പെട്ട് നീക്കം ചെയ്തിരുന്നു.
കുതിരപ്പുഴയുടെ സമീപമായതിനാല്‍ മഴ പെയ്താല്‍ പുഴയിലേക്ക് മാലിന്യങ്ങള്‍ ഒലിച്ചിറങ്ങാന്‍ സാധ്യതയുണ്ട്. രൂക്ഷമായ കുടിവെള്ള ക്ഷാമം അനുഭവിക്കുന്ന പ്രദേശത്ത് ആകെ ആശ്വാസമായ പുഴകൂടി മലിനമാകുന്നതോടെ നാട്ടുകാര്‍ ആശങ്കയിലാണ്.
പ്രദേശത്തെ നാട്ടുകാര്‍ കുളിക്കുന്നതിനും കുടിക്കുന്നതിനും ഈ പുഴയാണ് ആശ്രയിക്കുന്നത്.
നിരന്തരമായി ഇവിടെ കക്കൂസ് മാലിന്യങ്ങള്‍ കൊണ്ടിടുന്നവര്‍ക്കെതിരേ നിയമ നടപടികള്‍ സ്വീകരിക്കണമെന്നാവശ്യപ്പെട്ടു വാര്‍ഡ് അംഗം ഒടുങ്ങില്‍ ഷാജി, സുരേഷ് കൈപ്രം തുടങ്ങിയവരുടെ നേതൃത്വത്തില്‍ പൂക്കോട്ടുംപാടം പൊലിസ്, പഞ്ചായത്ത് സെക്രട്ടറി, പ്രസിഡന്റ് എന്നിവര്‍ക്ക് പരാതി നല്‍കിയിട്ടുണ്ട്.