തിരുവനന്തപുരം: കൊവിഡിന്റെ പശ്ചാത്തലത്തില്‍ സാമൂഹികാകലം പാലിച്ച് മദ്യശാലകളില്‍ ക്യൂ നില്‍ക്കാതെ മദ്യം വാങ്ങുന്നതിനായി ഓണ്‍ലൈന്‍ ടോക്കണ്‍ നല്‍കുന്നതിനുള്ള ആപ്പ് തയാറാകുന്നു. ആപ്പ് തയാറാക്കി പരീക്ഷണാടിസ്ഥാനത്തില്‍ ഉപയോഗിച്ചു കഴിഞ്ഞാല്‍ ഉടന്‍ സംസ്ഥാനത്തെ മദ്യശാലകള്‍ ഒരുമിച്ച് തുറക്കും. സര്‍ക്കാര്‍ മേഖലയിലെ മാത്രമല്ല, ബാറുകള്‍ ഉള്‍പ്പെടെയാണ് പാഴ്‌സല്‍ സംവിധാനത്തോടെ തുറക്കുന്നത്. 

വെര്‍ച്വല്‍ ക്യൂ സമ്പ്രദായം ഏര്‍പ്പെടുത്തുന്നതിനായി ആപ്പ് തയാറാക്കാന്‍ ഫെയര്‍കോഡ് എന്ന സ്റ്റാര്‍ട്ടപ്പ് കമ്പനിയെയാണ് തെരഞ്ഞെടുത്തിരിക്കുന്നത്. ആപ്പും സോഫ്ട് വെയറും തയാറാക്കാന്‍ താല്‍പര്യം പ്രകടിപ്പിച്ചെത്തിയ മുപ്പത് കംപനികളില്‍ ഒന്നിനെയാണ് തെരഞ്ഞെടുത്തത്. 

ടെണ്ടര്‍ നടപടികളും മറ്റും കാലതാമസമുണ്ടാക്കുമെന്നുകണ്ടാണ് സ്റ്റാര്‍ട്ടപ്പ് കംപനിയെ ഇതിനായി നിയോഗിക്കുന്നതിലേക്ക് നയിച്ചത്. ബിവറേജസ് കോര്‍പ്പറേഷന്റെയും ത്രിവേണി ഔട്ട്‌ലറ്റുകളുടേയും വിവരങ്ങള്‍ക്കൊപ്പം എല്ലാ ബാറുകളുടേയും വിവരങ്ങള്‍ ആപ്പില്‍ ഉള്‍ക്കൊള്ളിക്കേണ്ടതുണ്ട്. 

ഇക്കാര്യങ്ങള്‍ പൂര്‍ത്തിയാകുന്നതിന് രണ്ട് ദിവസംകൂടിയെടുക്കുമെന്നാണ് കരുതുന്നത്. അങ്ങനെയെങ്കില്‍ ചൊവ്വാഴ്ചയോടെ ആപ്പ് തയാറാക്കല്‍ പൂര്‍ത്തിയാകും. 

ബുധനാഴ്ച മന്ത്രിസഭാ യോഗം ചേര്‍ന്നായിരിക്കും മദ്യശാലകള്‍ എന്ന് തുറക്കണമെന്ന് തീരുമാനിക്കുക. ഏതായാലും ഈ ആഴ്ചതന്നെ മദ്യശാലകള്‍ തുറക്കാനാണ് സാധ്യത.