ശാസ്താംകോട്ട: ഇന്നലെ പുലര്‍ച്ചെ അജ്ഞാത ജീവിയുടെ കടിയേറ്റ ഗര്‍ഭിണികളായ രണ്ട് ആടുകള്‍ ചത്തു. പനപ്പെട്ടി മഠത്തില്‍ നജീബിന്റെ വീട്ടിലെ ആടുകളാണ് ചത്തത്.
പുലര്‍ച്ചെ മൂന്നിന് ആടിന്റെ കരച്ചില്‍ കേട്ട് തൊഴുത്തില്‍ നോക്കിയപ്പോള്‍ മൂന്ന് ആടുകളില്‍ ഒരു ആടിന്റെ കയര്‍ കടിച്ചു പൊട്ടിക്കുകയും ആടിനെ ആക്രമിക്കുകയും ചെയ്തട്ടുണ്ടായിരുന്നു. തുടര്‍ന്ന് ആടിനെ മാറ്റി മറ്റൊരു കൂട്ടിലാക്കുകയും വീട്ടുകാര്‍ ഉറങ്ങാനായി പോകുകയും ചെയ്തു. രാവിലെ ഏഴോടെ കൂട്ടില്‍ നോക്കിയപ്പോഴാണ് കൂട്ടത്തിലുണ്ടായിരുന്ന ഗര്‍ഭിണിയായ മറ്റ് രണ്ടു ആടുകളെ കടിച്ചു കൊന്നതായി കണ്ടത്. വയറു ഭാഗം കടിച്ചുകീറി കുഞ്ഞിനെ പുറത്തേക്ക് എടുത്ത അവസ്ഥയിലായിരുന്നു. തെരുവ് നായ്ക്കളാകാം കൊന്നതെന്ന് സംശയിക്കുന്നു.
ഇതുവരെ ഭരണിക്കാവ് പ്രദേശങ്ങളില്‍ നിന്നും 25ഓളം വളര്‍ത്തുമൃഗങ്ങള്‍ക്കാണ് ഇത്തരത്തില്‍ കടിയേറ്റ് ചികിത്സക്കായി കൊണ്ടുവന്നിട്ടുള്ളതെന്ന് ശാസ്താംകോട്ട മൃഗ ഡോക്ടര്‍ സുജാത പറഞ്ഞു.