കൊട്ടാരക്കര: സാക്ഷരതാ പ്രവര്‍ത്തനത്തിന് നിരവധി പുരസ്‌കാരങ്ങള്‍ നേടിയ സാക്ഷരതാ പ്രേരകിനേയും ഭര്‍ത്താവിനേയും മര്‍ദിച്ചതായി പരാതി. ഉമ്മന്നൂര്‍ തുടര്‍വിദ്യാ കേന്ദ്രത്തിലെ സാക്ഷരതാ പ്രേരക് വിലങ്ങറ പൈങ്ങയില്‍ സൗപര്‍ണ്ണികയില്‍ ഷീജ (35), ഭര്‍ത്താവ് സന്തോഷ്‌കുമാര്‍ (39) എന്നിവര്‍ക്കാണ് മര്‍ദനമേറ്റത്.
 പരുക്കേറ്റ ഇരുവരും കൊട്ടാരക്കര താലൂക്കാശുപത്രിയില്‍ ചികിത്സയിലാണ്. പൈങ്ങയില്‍ മുക്കില്‍ തടിമില്ല് നടത്തുന്ന ഓമനകുട്ടന്‍ ഉണ്ണിത്താനാണ് മര്‍ദിച്ചതെന്ന് കൊട്ടാരക്കര പൊലിസിനു നല്‍കിയ പരാതിയില്‍ പറയുന്നു. ഓമക്കുട്ടന്‍ ഉണ്ണിത്താന്‍ കെ.ഐ.പി  വക സ്ഥലവും പൊതുവഴിയും കൈയേറിയതായി പരാതിയുണ്ട്.
ഇതിനെതിരേ ഷീജയുടെ നേതൃത്വത്തില്‍ നാട്ടുകാര്‍ പ്രതിഷേധം ഉയര്‍ത്തിയിരുന്നു. ഷീജ നല്‍കിയ പരാതിയുടെ അടിസ്ഥാനത്തില്‍ ഇതു സംബന്ധിച്ച്  കേസ് കോടതിയില്‍ നടന്നുവരികയാണ്. ഇന്നലെ കേസ് കോടതിയില്‍ പരിഗണിക്കുന്ന ദിവസമായിരുന്നു. ഇതിന് തലേദിവസം വൈകിട്ട് 7.15 ഓടെ ജോലി കഴിഞ്ഞ് ബൈക്കില്‍ വരുമ്പോഴാണ് സന്തോഷ് കുമാറിനെതിരേ ആക്രമണം ഉണ്ടായത്. വീട്ടിനുസമീപം ബൈക്കിലെത്തിയ  സന്തേഷ്‌കുമാറിനെ അസഭ്യം പറഞ്ഞ് ആക്രമിക്കുകയാണുണ്ടായതെന്ന് പരാതിയില്‍ പറയുന്നു. തടയാന്‍ ശ്രമിച്ചപ്പോഴാണ് ഷീജയ്ക്ക് മര്‍ദനമേറ്റത്.  
അസഭ്യം പറയുകയും മുഖത്തടിക്കുകയും അടിവയറ്റില്‍ ചവിട്ടുകയും ചെയ്തതായി  ഷീജ നല്‍കിയ പരാതിയില്‍ പറയുന്നു. പൊലിസ് കേസില്‍ അന്വേഷണം ഊര്‍ജ്ജിതമാക്കിയിട്ടുണ്ട്.