തിരുവനന്തപുരം: കടുത്ത സാമ്പത്തിക പ്രതിസന്ധിയെ തുടര്‍ന്ന് സംസ്ഥാനത്തെ ട്രഷറികളില്‍ ഏര്‍പ്പെടുത്തിയിരുന്ന നിയന്ത്രങ്ങളില്‍ ഭാഗികമായ ഇളവുവരുത്തി. അഞ്ചു കോടി രൂപ വരെയുള്ള ബില്ലുകള്‍ ട്രഷറിയില്‍ മാറാനാണ് ഇളവനുവദിച്ചിരിക്കുന്നത്. 

കര്‍ശന നിയന്ത്രണമുണ്ടായിരുന്ന സാഹചര്യത്തില്‍ അഞ്ചു ലക്ഷം വരെയുള്ള ബില്ലുകളും ചെക്കുകളും മാറാനായിരുന്നു കഴിഞ്ഞ മാസം സര്‍ക്കാര്‍ അനുമതി നല്‍കിയിരുന്നത്. 

അന്ന് തദ്ദേശ സ്വയംഭരണ സ്ഥാപനങ്ങളുടെ ചെക്കുകള്‍ക്കും ബില്ലുകള്‍ക്കുമായിരുന്നു അനുമതി ലഭിച്ചത്. സര്‍ക്കാരിന്റെ 29 ഇന ചെലവുകള്‍ക്കു വേണ്ടിയായിരുന്നു അനുമതി. 

സര്‍ക്കാര്‍ ജീവനക്കാരുടെ മാസ ശമ്പളത്തില്‍നിന്ന് ആറു ദിവസത്തെ ശമ്പളം പിടിച്ചതിലൂടെ ലഭിച്ച പണം കൂടി ട്രഷറിയില്‍ എത്തിയതോടെയാണ് പുതിയ ഇളവുകളിലേക്ക് നീങ്ങിയതെന്നു പറയപ്പെടുന്നു. 

ട്രഷറി ക്യൂവിലുള്ളതും ബില്‍ ഡിസ്‌ക്കൗണ്ട് സിസ്റ്റം തെരഞ്ഞെടുത്തതും ഇതുവരെ പണം ലഭിക്കാത്തതുമായ അഞ്ച് കോടി രൂപവരെയുള്ള ബില്ലുകള്‍ക്ക് ഉടന്‍ പണം കൊടുക്കാനാണ് ധനവകുപ്പ് ഇപ്പോള്‍ ഉത്തരവിട്ടിരിക്കുന്നത്. ബില്ലുകള്‍ ട്രഷറിയില്‍ സമര്‍പ്പിച്ച തിയതിയുടെ മുന്‍ഗണന അനുസരിച്ച് പണം നല്‍കാനാണ് നിര്‍ദേശം. 

അഞ്ചു ലക്ഷം രൂപയുടെ ബില്ലുകള്‍ മാത്രം മാറി നല്‍കിയാല്‍ മതിയെന്ന നിര്‍ദേശത്തില്‍നിന്നാണ് ട്രഷറി നിയന്ത്രണങ്ങള്‍ അഞ്ചു കോടിയിലേക്കെത്തിയത്.