റിയാദ്: കൊവിഡ് 19 ബാധിച്ച് ജിദ്ദയിൽ ഇന്ന് ഒരു മലയാളി കൂടി മരണപ്പെട്ടു. ക്വാറന്‍റൈനിൽ കഴിയുകയായിരുന്ന വഴിക്കടവ് സ്വദേശിയാണ് ജിദ്ദയിൽ മരണപ്പെട്ട മൂന്നാമത്തെ മലയാളി. വഴിക്കടവ് പൊലീസ് സ്റ്റേഷൻ വെട്ടുക്കത്തിക്കോട്ടയിലെ പരേതനായ പുതിയത്ത് ഹൈദ്രുവിന്‍റെ മകൻ മുഹമ്മദ് എന്ന കുഞ്ഞു (52)ആണ് മരണപെട്ടത്. ജിദ്ദ സനാഇയ്യയിൽ ടിഷ‍്യൂ പേപ്പർ കമ്പനിയിൽ ജോലി ചെയ്തു വരികയായിരുന്നു.

      കൊവിഡ് പോസിറ്റീവ് കാരണം കിംഗ് അബ്ദുൽ അസീസ് ഹോസ്പിറ്റലിൽ നാല് ദിവസത്തോളമായി ചികിത്സയിൽ ആയിരുന്നു. മൃതദേഹം ജിദ്ദയിൽ തന്നെ കബറടക്കും. ഭാര‍്യ: നബീസ. മക്കൾ: സക്കീർ ഹുസൈൻ (കുവൈറ്റ്) മുഹമ്മദ് ഷമീൽ, സഹീന. മാതാവ് ആയിശുമ.

      ഇതോടെ, ഇന്ന് മാത്രം ജിദ്ദയിൽ മരണപ്പെട്ട മലയാളികൾ മൂന്നായി. മൂവരും മലപ്പുറം സ്വദേശികളുമാണ്.