ബിരാത് നഗര്‍: അഞ്ചാം കിരീടം തേടി ഇന്ത്യന്‍ വനിതാ ടീം ഇന്ന് സാഫ് വനിതാ ഫുട്‌ബോള്‍ ചാംപ്യന്‍ഷിപ്പ് ഫൈനലിനിറങ്ങും. ഉച്ചക്ക് 2.30ന് നേപ്പാളിലെ ഷാഹിദ് റംഗ്‌സാല സ്റ്റേഡിയത്തില്‍ നടക്കുന്ന ഫൈനലില്‍ ആതിഥേയരായ നേപ്പാളാണ് എതിരാളികള്‍. ഇതുവരെയുള്ള സാഫ് ചാംപ്യഷിപ്പ് കിരീടങ്ങളെല്ലാം ഇന്ത്യയാണ് നേടിയത്. ഇന്നത്തെ മത്സരവും ജയിച്ച് തുടര്‍ച്ചയായ അഞ്ചാം തവണയും കിരീടം ഇന്ത്യയിലെത്തിക്കാമെന്ന പ്രതീക്ഷയിലാണ് ടീമംഗങ്ങള്‍.

2010, 2012, 2014, 2016 വര്‍ഷങ്ങളില്‍ ഇന്ത്യ കിരീടം നേടിയപ്പോള്‍ മൂന്ന് തവണയും നേപ്പാളായിരുന്നു ഫൈനലില്‍ ഇന്ത്യയുടെ എതിരാളികള്‍. 2016ല്‍ ബംഗ്ലാദേശായിരുന്നു ഫൈനലില്‍ ഇന്ത്യയെ നേരിട്ടത്. അന്ന് സെമിഫൈനലിലെത്തിയ നേപ്പാള്‍ 3-1ന് ഇന്ത്യക്ക് മുന്‍പിലാണ് കീഴടങ്ങിയത്.
ആദ്യ കിരീടം ലക്ഷ്യമിട്ടെത്തുന്ന നേപ്പാളിന് മൂന്ന് ഫൈനലുകളിലെ തോല്‍വിക്ക് പ്രതികാരം വീട്ടുകയാവും ലക്ഷ്യം. കിരീടം കൈവിടാതെ സൂക്ഷിക്കാന്‍ ഇന്ത്യയും പൊരുതുന്നതോടെ ഫൈനല്‍ പോരാട്ടം കടുക്കും.