കൊണ്ടോട്ടി: കരിപ്പൂര്‍ വിമാനത്താവളത്തില്‍ അഞ്ച് യാത്രക്കാരില്‍ നിന്നായി സ്വര്‍ണവും സിഗരറ്റുകളും എയര്‍ കസ്റ്റംസ് ഇന്റലിജന്‍സ് പിടികൂടി. 39.49 ലക്ഷം രൂപ വില വരുന്ന 1177 ഗ്രാം സ്വര്‍ണവും 61,400 വിദേശ നിര്‍മിത സിഗരറ്റുമാണ് പിടികൂടിയത്.

ഒമാന്‍ എയറില്‍ മസ്‌കത്തില്‍ നിന്നെത്തിയ മലപ്പുറം സ്വദേശിനി ഷംലയില്‍നിന്നാണ് 15.36 ലക്ഷം രൂപയുടെ 464 ഗ്രാം സ്വര്‍ണം കണ്ടെത്തിയത്. ദുബൈയില്‍ നിന്നുള്ള എയര്‍ഇന്ത്യ എക്‌സ്പ്രസിലെത്തിയ കാസര്‍കോട് പള്ളിക്കര സ്വദേശി ഫൈസലിന്റെ ബാഗേജില്‍നിന്ന് 68,400 രൂപയുടെ 34,200 സിഗരറ്റുകളാണ് പിടികൂടിയത്. ഇതേ വിമാനത്തിലെത്തിയ കാഞ്ഞങ്ങാട് സ്വദേശി ഹമീദില്‍ നിന്ന് 80 ഗ്രാം സ്വര്‍ണവും 27,200 സിഗരറ്റുകളും കണ്ടെത്തി.

ദുബൈയില്‍ നിന്നുള്ള എയര്‍ഇന്ത്യ എക്‌സ്പ്രസിലെത്തിയ കര്‍ണാടക കര്‍വാര്‍ സ്വദേശി അബ്ദുല്‍ വഹീദില്‍നിന്ന് 7.51 ലക്ഷത്തിന്റെ 232 ഗ്രാം സ്വര്‍ണമാണ് പിടികൂടിയത്. പെട്ടിയുടെ ബീഡിങിന്റെ രൂപത്തിലാക്കി കടത്താനായിരുന്നു ശ്രമം.

ദുബൈയില്‍ നിന്നുള്ള ഇന്‍ഡിഗോ വിമാനത്തിലെത്തിയ കോഴിക്കോട് സ്വദേശി അബ്ദുല്‍ റഹീമില്‍നിന്ന് 11.62ലക്ഷത്തിന്റെ 401 ഗ്രാം സ്വര്‍ണം കണ്ടെത്തി.