എടച്ചേരി: പരീക്ഷാക്കാലം കഴിഞ്ഞ് വിദ്യാലയങ്ങള്‍ മധ്യവേനലവധിയിലേക്ക് പ്രവേശിച്ചതോടെ നാട്ടിന്‍പുറങ്ങളില്‍ കുട്ടിക്കടകള്‍ സജീവമായി. ടൗണുകളെ അപേക്ഷിച്ച് ഗ്രാമപ്രദേശങ്ങളിലാണ് ഇത്തരം കടകള്‍ കൂടുതലായും കാണപ്പെടുന്നത്. വിവിധയിനം  മിഠായികളും സിപ്പപ്പ് ഐസുകളും സുലഭമായ കടകളില്‍ ചെറിയ വില കൊടുത്ത് വാങ്ങാവുന്ന ചിപ്‌സ് പായ്ക്കറ്റുകളും സ്ഥലം പിടിച്ചിട്ടുണ്ട്. അവധിക്കാലം അടിച്ചു പൊളിച്ച് ആഘോഷമാക്കിയിരുന്ന പഴയ കാലത്തില്‍ നിന്നു വ്യത്യസ്തമായി കംപ്യൂട്ടര്‍ ഗെയിമുകളില്‍ സമയം കൊല്ലുന്ന ന്യൂ ജെനറേഷന്‍ കുട്ടികള്‍ക്ക് ഒരു തിരുത്താവുകയാണ് ഇത്തരം കുട്ടിക്കടകള്‍.
 അല്‍പം പണം ചെലവാക്കിയാലും കഠിനമായ ചൂടില്‍നിന്നു കുട്ടികള്‍ രക്ഷപ്പെടുമെന്ന ആശ്വാസത്തില്‍ ചില രക്ഷിതാക്കള്‍ തന്നെ കട നടത്തിപ്പിനു പ്രോത്സാഹനമായി മുന്‍പന്തിയില്‍ നില്‍ക്കുന്നുണ്ട്.
 കൃത്യസമയത്ത് തുറക്കുകയും വൈകുന്നേരങ്ങളിലെ പതിവു കളികള്‍ മുടങ്ങാത്ത വിധം പ്രവൃത്തി സമയം ക്രമീകരിക്കുകയും ചെയ്യുന്നവരും ഇവരിലുണ്ട്. കുട്ടികള്‍ അപകടകരമായ കളികളില്‍ നിന്നു മാറിനില്‍ക്കുമെന്നതും അവരില്‍ സമ്പാദ്യശീലം വളര്‍ന്നുവരുമെന്നതും കുട്ടിക്കച്ചവടത്തിന്റെ ഗുണവശങ്ങളായി രക്ഷിതാക്കള്‍ കാണുന്നു.