മലപ്പുറം: ഓണ്‍ലൈന്‍ മദ്‌റസയില്‍ പ്രാരഭ പ്രാര്‍ഥനയുമായി ലക്ഷക്കണക്കിനു വിദ്യാര്‍ഥികളുടെ മുന്‍പിലെത്തുമ്പോള്‍ പാണക്കാട്ടെ ഈ കൊച്ചുഹാഫിള് സയ്യിദ് സ്വിദ്ഖലി ശിഹാബ് തങ്ങള്‍ അനുഭൂതിയുടെ നിറവിലാകും. സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് ആവിഷ്‌കരിച്ച ഓണ്‍ലൈന്‍ മദ്‌റസ രാവിലെ 7.30നു തുടങ്ങിയാല്‍ ആദ്യമെത്തുക ഈ കൊച്ചുമിടുക്കന്റെ മനോഹരമായ ഖുര്‍ആന്‍ പാരായണമാണ്. സയ്യിദ് അബ്ബാസലി ശിഹാബ് തങ്ങളുടെ പുത്രനാണ് ഹാഫിള് സ്വിദ്ഖലി ശിഹാബ് തങ്ങള്‍. ഒന്നു മുതല്‍ പ്ലസ്ടു വരെ ക്ലാസുകളിലെ വിദ്യാര്‍ഥികള്‍ സ്വിദ്ഖലി തങ്ങള്‍ക്കൊപ്പം ഫാതിഹ പാരായണം ചെയ്തും ആമീന്‍ ചൊല്ലിയും ക്ലാസിലിരിക്കുന്നതോടെ വീട്ടകങ്ങള്‍ ഭക്തിസാന്ദ്രമാവുകയായി.

2017ലാണ് സ്വിദ്ഖലി ശിഹാബ് തങ്ങള്‍ വിശുദ്ധ ഖുര്‍ആന്‍ മനഃപാഠമാക്കിയത്. പാണക്കാട് സ്‌ട്രൈറ്റ്പാത്ത് സ്‌കൂള്‍ ഓഫ് ഖുര്‍ആനിലായിരുന്നു പഠനം. ഇപ്പോള്‍ ഇതേ സ്ഥാപനത്തില്‍ എട്ടാംതരം വിദ്യാര്‍ഥിയാണ്. ഒഴിവുവേളകളില്‍ പിതാവ് സയ്യിദ് അബ്ബാസലി ശിഹാബ് തങ്ങളും മറ്റു സമയങ്ങളില്‍  മാതാവ് സയ്യിദത്ത് സജ്‌നാ ബീവിയുമാണ് മനഃപാഠ പാരായണം ശ്രദ്ധിക്കുന്നത്. ജ്യേഷ്ഠന്‍ സയ്യിദ് റാജിഅ് അലി ശിഹാബ് തങ്ങളും ഹാഫിളാണ്. ജ്യേഷ്ഠന്റെ പഠനത്തില്‍ പ്രചോദനമായാണ് സ്വിദ്ഖലിയും സയ്യിദ് ഹമീദലി ശിഹാബ് തങ്ങളുടെ പുത്രന്‍ സയ്യിദ് മിയാസലി ശിഹാബും ഹിഫ്‌ള് പഠനത്തിലേക്കു തിരിഞ്ഞത്. ഇരുവരും ഒരുമിച്ച് ഖുര്‍ആന്‍ മനഃപാഠമാക്കുകയും ചെയ്തു. സയ്യിദ് റസാന്‍ അലി ശിഹാബ്, സയ്യിദ് ആഹില്‍ അലി ശിഹാബ്, സയ്യിദത്ത് ഖദീജ ഹില്‍യ എന്നിവരാണ് മറ്റു സഹോദരങ്ങള്‍.                                                               

എട്ടാംതരം വിദ്യാര്‍ഥിയായ സ്വിദ്ഖലി ശിഹാബും കെ.ജി പഠനം കഴിഞ്ഞ് ഈ വര്‍ഷം ഒന്നാംതരം അഡ്മിഷന്‍ നേടിയ ആഹില്‍ അലി ശിഹാബും വീട്ടില്‍ ഓണ്‍ലൈന്‍ ക്ലാസുകള്‍ ആസ്വദിച്ചു പഠിക്കുകയാണിവര്‍. ക്ലാസുകളില്‍ മക്കള്‍ രണ്ടുപേര്‍ക്കുമൊപ്പം ഉപ്പയും ഉമ്മയും കൂട്ടിനുണ്ട്. ലക്ഷക്കണക്കിനു വിദ്യാര്‍ഥികള്‍ക്കു മദ്‌റസ തുടങ്ങുംനേരം ഓതിക്കൊടുക്കാനായത് വലിയ സൗഭാഗ്യമാണെന്ന് സ്വിദ്ഖലി ശിഹാബ് തങ്ങള്‍ പറയുന്നു.