കരുവാരകുണ്ട്: 2.5 കിലോ കഞ്ചാവുമായി യുവാവ് കരുവാരകുണ്ട് പൊലിസിന്റെ പിടിയിലായി. മലയോരമേഖലയില്‍ യുവാക്കളെയും വിദ്യാര്‍ഥികളെയും ലക്ഷ്യമിട്ടു ചില്ലറ വില്‍പനയ്ക്കായി എത്തിച്ച കഞ്ചാവുമായി പാലക്കാട് ജില്ലയിലെ എടത്തനാട്ടുകര നാലുകണ്ടം ചേറിയാടന്‍ വീട്ടില്‍ ഷാനവാസാ (36) ണ് പിടിയിലായത്.
ഇന്നലെ ഉച്ചയോടെ കരുവാരകുണ്ട് കരിങ്കന്തോണിയില്‍വച്ചാണ് കരുവാരകുണ്ട് സബ് ഇന്‍സ്‌പെക്ടര്‍ പി. ജ്യോതീന്ദ്രകുമാറും സംഘവും ഇയാളെ പിടികൂടിയത്. ഈ മേഖലയില്‍ വ്യാപകമായി കഞ്ചാവ് വില്‍പന നടക്കുന്നുണ്ടെന്ന വിവരത്തിന്റെ അടിസ്ഥാനത്തില്‍ പ്രതിയെ നിരീക്ഷിച്ചുവരികയായിരുന്നു. ലോറി ഡ്രൈവറായ പ്രതി എടത്തനാട്ടുകര ഭാഗങ്ങളില്‍ കാലങ്ങളായി കഞ്ചാവ് ചില്ലറ വില്‍പന നടത്തിവരികയാണ്.
സീനിയര്‍ സിവില്‍ പൊലിസ് ഓഫിസര്‍മാരായ സെബാസ്റ്റ്യന്‍, രാജേഷ്, രാമചന്ദ്രന്‍, സിവില്‍ പൊലിസ് ഓഫിസര്‍മാരായ അജീഷ്, രാജ്‌മോഹന്‍, സുധീഷ്, അരുണ്‍, മുബശ്ശിര്‍ തുടങ്ങിയവരും പൊലിസ് സംഘത്തിലുണ്ടായിരുന്നു.