കണ്ണൂര്‍: കൊല്ലപ്പെട്ട അരിയില്‍ ഷുക്കൂര്‍ പഠിച്ച പാപ്പിനിശ്ശേരി അറബിക് കോളജില്‍ പര്യടനത്തിനെത്തിയ യു.ഡി.എഫ് സ്ഥാനാര്‍ഥി കെ. സുധാകരനെ കോളജ് വരവേറ്റത് ആവേശത്തോടെ. ശുഹൈബിന്റെ നേതാവിന് ഷുക്കൂറിന്റെ കോളജിലേക്ക് സ്വാഗതം എന്നെഴുതിയ പ്ലക്കാര്‍ഡ് ഉയര്‍ത്തിപിടിച്ചാണ് സുധാകരനെ വിദ്യാര്‍ഥികള്‍ സ്വീകരിച്ചത്.
കണ്ണൂര്‍ പാര്‍ലമെന്റ് യു.ഡി.എഫ് സ്ഥാനാര്‍ഥി കെ. സുധാകരന്‍ ഇന്നലെ ജില്ലയിലെ വിവിധ കോളജുകളിലും തൊഴില്‍ശാലകളില്‍ പര്യടനം നടത്തി. കണ്ണൂര്‍ സിറ്റി ഹംദര്‍ദ് സര്‍വകലാശാലാ ഓഫ് കാംപസ് സന്ദര്‍ശനം നടത്തിയാണ് പ്രചാരണം ആരംഭിച്ചത്.  തുടര്‍ന്ന് മുസ്‌ലിം ലീഗ് സംസ്ഥാന പ്രസിഡന്റ് പാണക്കാട് ഹൈദരലി ശിഹാബ് തങ്ങളോടൊപ്പം തെരഞ്ഞെടുപ്പ് കാര്യങ്ങള്‍ ചര്‍ച്ച ചെയ്ത് തങ്ങളുടെ അനുഗ്രഹം വാങ്ങി. ചെട്ടിപീടികയിലെ മൈബ്രാ കമ്പനിയില്‍ കയറി ജീവനക്കാരോട് വോട്ടഭ്യര്‍ഥിച്ചു. പൊടിക്കുണ്ട് മില്‍മ, പള്ളിക്കുന്ന് ജേബീസ് കോളജ്, ചിറക്കല്‍ കോവിലകം, പുതിയതെരു കസ്തൂര്‍ബാ ഇംഗ്ലിഷ് മീഡിയം സ്‌കൂള്‍, വാസുലാല്‍ കമ്പനി, അഴീക്കല്‍ ഹാര്‍ബര്‍, അഴീക്കലിലെ സില്‍ക്ക് എന്നിവിടങ്ങളില്‍ പര്യടനം നടത്തി.
തുടര്‍ന്നാണ് പാപ്പിനിശ്ശേരി അറബിക് കോളജിലെത്തിയത്.
കോട്ടക്കുന്ന് അറബിക് കോളജ്, ബാലന്‍ കിണര്‍ ഇന്‍ഡസ്ട്രിയല്‍ വര്‍ക്ക് ഷോപ്പ്, ദാറുല്‍ ഹസനാത്ത് കോളജ് കണ്ണാടിപ്പറമ്പ്, അത്താഴക്കുന്ന് ചിറക്കല്‍ തുരുത്തി എന്നീ പ്രാദേശങ്ങളിലും സന്ദര്‍ശനം നടത്തി. ബൈപ്പാസ് വിരുദ്ധ സമരസമിതിക്കാരുമായി ചര്‍ച്ച നടത്തിയാണ് സുധാകരന്‍ മടങ്ങിയത്.സുധാകരന്റെ പര്യടനം മാറ്റി
കണ്ണൂര്‍: എന്‍.എസ്.എസ് ജനറല്‍സെക്രട്ടറി ജി. സുകുമാരന്‍ നായരുടെ ഭാര്യ കെ. കുമാരിയുടെ സംസ്‌കാര ചടങ്ങില്‍ പങ്കെടുക്കുന്നതിനാല്‍ യു.ഡി.എഫ് സ്ഥാനാര്‍ഥി കെ. സുധാകരന്റെ ഇന്നത്തെ പര്യടനം മാറ്റി.