ന്യൂഡല്‍ഹി: കശ്മിരില്‍ സൈന്യം പെല്ലറ്റ് തോക്കുകള്‍ ഉപയോഗിക്കുന്നതിനെതിരേ വ്യാപക പ്രതിഷേധം ഉയര്‍ന്ന പശ്ചാത്തലത്തില്‍ കേന്ദ്ര സര്‍ക്കാര്‍ ബദല്‍ മാര്‍ഗം കണ്ടെത്തുന്നു.
ജനക്കൂട്ടത്തെ നിയന്ത്രിക്കാനും കല്ലെറിയുന്ന പ്രതിഷേധക്കാരെ പിന്തിരിപ്പിക്കാനുമായി പെല്ലറ്റിനു പകരം പ്ലാസ്റ്റിക് ബുള്ളറ്റുകള്‍ ഉപയോഗിക്കാമെന്നാണ് സര്‍ക്കാര്‍ അറിയിച്ചത്.
ശരീരത്തില്‍ തുളച്ചുകയറാത്ത രീതിയിലുള്ള പ്ലാസ്റ്റിക് ബുള്ളറ്റുകളാണ് ബദല്‍ ആയുധമായി നിര്‍ദേശിച്ചിരിക്കുന്നത്.
ആയിരക്കണക്കിന് പ്ലാസ്റ്റിക് ബുള്ളറ്റുകള്‍ നിര്‍മിച്ച് നേരത്തെ തന്നെ കശ്മിരിലെ സൈനികര്‍ക്ക് അയച്ചുകൊടുത്തിട്ടുണ്ടെന്ന് ആഭ്യന്തര മന്ത്രാലയ വൃത്തങ്ങള്‍ പറഞ്ഞു. അതേസമയം, മാരകമല്ലാത്ത ആയുധങ്ങളുടെ ഗണത്തില്‍ അവസാനത്തെ ആശ്രയമായി പെല്ലറ്റ് തോക്കുകള്‍ ഉപയോഗിക്കുന്നത് തുടരുമെന്നും സര്‍ക്കാര്‍ വൃത്തങ്ങള്‍ അറിയിച്ചു.
ഏതാനും മാസങ്ങളായി കശ്മിര്‍ താഴ്‌വരയില്‍ ശക്തിപ്പെടുന്ന പ്രക്ഷോഭങ്ങളെ നേരിടാന്‍ സൈന്യം പെല്ലറ്റ് തോക്കുകള്‍ ഉപയോഗിച്ചിരുന്നു.
ഇതിനെതിരേ വ്യാപക പരാതിയാണ് ഉയര്‍ന്നിരുന്നത്. പെല്ലറ്റിന് ബദല്‍ മാര്‍ഗങ്ങള്‍ കണ്ടെത്താന്‍ സുപ്രിംകോടതി കഴിഞ്ഞ മാസം കേന്ദ്ര സര്‍ക്കാരിനോട് നിര്‍ദേശിച്ചിരുന്നു.